Kreu i Organizatës Iraniane për Energji Atomike, Mohammad Eslami, deklaroi se Irani nuk do të lejojë asnjë ndërprerje në prodhimin dhe mirëmbajtjen e energjisë bërthamore.
“Kemi ndërmarrë masat e nevojshme të sigurisë dhe po vlerësojmë dëmet,” tha Eslami, duke iu referuar sulmeve të kryera nga Izraeli dhe Shtetet e Bashkuara ndaj objekteve kyçe bërthamore në Iran.
Ai theksoi se përgatitjet për rikuperimin e objekteve ishin parashikuar paraprakisht, dhe se plani i Iranit është të mos lejojë ndërprerje në proceset e prodhimit dhe shërbimeve të lidhura me energjinë bërthamore.
Pas sulmeve ajrore të SHBA-së ndaj objekteve bërthamore iraniane, një nga çështjet kryesore që mbetet e paqartë është nëse Irani ka arritur të evakuojë më herët pjesë të pajisjeve dhe rezervat e uraniumit të pasuruar deri në 60%.
Gjithashtu, ende nuk dihet në çfarë mase sulmet izraelite kanë dëmtuar objektet dhe nëse kanë pasur sukses në eliminimin e shkencëtarëve kyç të programit bërthamor.
Këshilltari i lartë i liderit suprem të Iranit, Ali Shamkhani, deklaroi të dielën se sulmet ajrore të SHBA-së nuk do ta ndalin programin bërthamor të Iranit.
“Edhe nëse objektet bërthamore shkatërrohen, loja nuk përfundon… materialet e pasuruara, njohuritë vendore dhe vullneti politik mbeten,” tha ai.
