“Ne kemi bërë një përpjekje të madhe në marrëdhëniet e BE-së me Turqinë. Por ka shumë pengesa dhe vështirësi të ndryshme që përsëriten përsëri dhe përsëri”, theksoi Merkel
Kancelarja gjermane, Angela Merkel, ka përshëndetur kthimin në port të anijes turke të shpimit Oruç Reis pasi përfundoi misionin e saj të kërkimit të energjisë në Mesdheun Lindor, transmeton Anadolu Agency (AA).
Duke folur në një konferencë virtuale mbi presidencën gjermane të Bashkimit Evropian (BE), Merkel tha se marrëdhëniet me Turqinë dhe tensionet e fundit në Mesdheun Lindor do të jenë midis temave kryesore të samitit të liderëve të BE-së më 10-11 dhjetor.
“Është një sinjal i mirë që Oruç Reis tani është kthyer në portin turk”, tha Merkel, por shprehu keqardhje se ata nuk mundën të arrijnë shumë përparim në dy muajt e fundit në uljen e tensioneve dhe tejkalimin e dallimeve midis anëtarëve të BE-së dhe Turqisë.
“Ne kemi bërë një përpjekje të madhe në marrëdhëniet e BE-së me Turqinë. Por ka shumë pengesa dhe vështirësi të ndryshme që përsëriten përsëri dhe përsëri. Tani ne duhet të shohim se si do të shkojë diskutimi në dhjetor. Por duhet të them se nuk kemi bërë aq përparime sa po shpresoja”, theksoi Merkel.
Pas samitit të tyre në fillim të tetorit, liderët e BE-së përsëritën solidaritetin e bllokut evropian me anëtarët e BE-së, Greqinë dhe administratën Greke Qipriote, si dhe i bënë thirrje Ankarasë të ndërmarrë hapa për të de-përshkallëzuar tensionet në Mesdheun Lindor.
Ata po ashtu u pajtuan për të riaktivizuar marrëdhëniet BE-Turqi, duke filluar një “agjendë pozitive” me theks të veçantë në modernizimin e unionit doganor BE-Turqi, rritjen e lidhjeve tregtare dhe ekonomike, bashkëpunimin mbi migracionin dhe çështje të tjera me interes të përbashkët.
Mes tensioneve të fundit në rajon, Greqia dhe administrata Greke Qipriote kanë rritur presionin e tyre ndaj anëtarëve të tjerë të BE-së për të vendosur sanksione ndaj Turqisë gjatë samitit të ardhshëm të liderëve të BE-së.
Gjermania, kryesuese aktuale e BE-së, si dhe shumica e anëtarëve të BE-së deri më tani kanë hezituar për të ndërmarrë një veprim të tillë.
Turqia, e cila ka vijën më të gjatë bregdetare kontinentale në Mesdheun Lindor, ka refuzuar pretendimet kufitare detare të Greqisë dhe administratës Greke Qipriote, si dhe ka theksuar se këto pretendime të tepërta shkelin të drejtat sovrane të Turqisë dhe Republikës Turke të Qipros Veriore (TRNC).
Javëve të fundit, Ankaraja ka dërguar disa anije të shpimit për të eksploruar burimet e energjisë në Mesdheun Lindor, duke mbrojtur të drejtat e veta në rajon, si dhe ato të TRNC-së.
Liderët turq në vazhdimësi kanë theksuar se Ankaraja është në favor të zgjidhjes së të gjitha problemeve të pazgjidhura në rajon përmes ligjit ndërkombëtar, marrëdhënieve të fqinjësisë së mirë, dialogut dhe negociatave.
