Të paktën 60 persona janë vrarë të premten në Rripin e Gazës si pasojë e sulmeve izraelite, ka bërë të ditur Mbrojtja Civile e Gazës, sipas raportimeve të agjencisë Agence France-Presse (AFP).
Zëdhënësi i Mbrojtjes Civile, Mahmud Bassal, deklaroi se të paktën gjysma e viktimave u vranë ndërsa prisnin ndihma humanitare. Pesë persona u vranë teksa qëndronin në radhë për të marrë ushqim në jug të Gazës, ndërsa edhe 26 të tjerë humbën jetën pranë të ashtuquajturit “korridor Netzarim”, një zonë nën kontrollin ushtarak izraelit që ndan Gazën në dy pjesë.
Çdo ditë, mijëra palestinezë grumbullohen në këtë zonë me shpresën për të marrë ushqim dhe ndihma bazë, ndërsa uria kërcënon gjithë popullsinë e Gazës pas më shumë se 20 muaj lufte.
Sipas një deklarate të ushtrisë izraelite për AFP, ushtarët izraelitë në zonën e Netzarim kanë qëlluar “plumba paralajmërues” ndaj disa “të dyshuarve” që po u afroheshin. Meqenëse nuk janë ndalur, “është thirrur një avion që ka ndërmarrë sulm ajror dhe ka eliminuar të dyshuarit për të shmangur kërcënimin”, thuhet në deklaratë.
Qendra e Gazës
Sipas Mahmud Bassal, 14 persona janë vrarë në dy sulme të ndara në dhe rreth qytetit Deir el-Balah, në qendër të Gazës. 13 të tjerë u vranë në tre sulme ajrore izraelite në zonën e qytetit të Gazës. Njëri nga sulmet, i cili vrau tre persona, goditi një pikë karikimi për telefonat celularë.
Në jug të Gazës, dy persona të tjerë u vranë nga zjarri izraelit në dy incidente të ndara.
Masakrat ndaj civilëve palestinezë, edhe gjatë shpërndarjes së ndihmave, po përshkallëzojnë tragjedinë humanitare në Gazë dhe po shkaktojnë reagime gjithnjë e më të ashpra në opinionin ndërkombëtar.
