Ismail Haniyeh foli mbi një sërë çështjesh në një intervistë ekskluzive me Anadolu Agency
Afrimi i fundit Turqi-Egjipt do t’i shërbejë çështjes së Palestinës, tha lideri i lëvizjes së rezistencës palestineze Hamas, duke përshëndetur përpjekjet për pajtimin midis dy vendeve të mëdha.
“Ne e mirëpresim afrimin turko-egjiptian dhe besojmë se më shumë mirëkuptime midis tyre dhe midis vendeve arabe dhe islame do të reflektojnë pozitivisht tek ne në Palestinë dhe në vendet arabe”, tha Ismail Haniyeh në një intervistë ekskluzive me Zëvendësdrejtorin e Përgjithshëm dhe Kryeredaktorin e Anadolu Agency (AA), Metin Mutanoğlu.
Haniyeh përshkroi Turqinë, Egjiptin, Iranin dhe Arabinë Saudite si “shtete qendrore” që luajnë një “rol strategjik” në rajon, duke shtuar se çdo mirëkuptim midis tyre u shërben interesave të Palestinës dhe, natyrisht, popujve të rajonit.
“Në të kundërt”, tha shefi i Hamasit, “çdo konflikt midis shteteve arabe dhe muslimane ndikon negativisht në aftësitë e Umetit”, dëmton kauzën palestineze dhe “i siguron entitetit sionist një mundësi të artë për të ndjekur projektet e saj të aneksimit dhe judaizimit”.
Turqia dhe Egjipti kanë lëshuar kohët e fundit deklarata mbi lidhjet dypalëshe, duke sugjeruar një rivendosje të pritshme në marrëdhëniet pas më shumë se shtatë vitesh largimi politik.
Muajin e kaluar, ministri i Jashtëm turk Mevlüt Çavuşoğlu njoftoi fillimin e kontakteve diplomatike midis Ankarasë dhe Kajros me një qëllim për të normalizuar marrëdhëniet pa parakushte.
Zgjedhjet palestineze, shans për unitet
Duke komentuar zgjedhjet e ardhshme legjislative në Palestinë të planifikuara për në maj, Haniyeh shprehu “angazhimin” e lëvizjes së tij për të formuar një qeveri “konsensuale kombëtare” edhe nëse ajo del fituese, duke thënë se ky hap është i rëndësishëm në përballjen me pushtimin sionist.
“Hamasi merr pjesë në zgjedhje në bazë të partneritetit dhe jo në bazë të fitores. Ajo nuk dëshiron të mbizotërojë sistemin politik palestinez”, tha Haniyeh.
Në janar, presidenti palestinez Mahmoud Abbas lëshoi një dekret që përcakton datat për zgjedhjet e këtij viti: zgjedhjet legjislative më 22 maj, zgjedhjet presidenciale më 31 korrik dhe ato të Këshillit Kombëtar më 31 gusht.
Sipas Haniyeh, zgjedhjet e ardhshme janë “kritike” në përmirësimin e kushteve aktuale palestineze.
“Këto zgjedhje janë një hap përpara për t’i dhënë fund ndarjes 15-vjeçare”, deklaroi ai.
Ai gjithashtu theksoi rëndësinë e “mesazheve dhe simboleve” që përmban lista e Hamasit për Kudsin, dëshmorët dhe të burgosurit.
“Ne zgjodhëm ‘Kudsi, destinacioni ynë’ si parullë elektorale, pikërisht për të konfirmuar që Kudsi është adresa jonë, busulla, kryeqyteti ynë dhe nderi ynë”, shpjegoi Haniyeh.
Udhëheqësi palestinez gjithashtu tha se ai është i bindur se zgjedhjet do të zhvillohen siç janë planifikuar pavarësisht presionit, veçanërisht nga Izraeli, për t’i shtyrë ato.
“Kjo është një nga sfidat para nesh, por ne po qëndrojmë te zgjedhjet si një mjet për të rregulluar shtëpinë tonë palestineze”, theksoi ai.
Javën e kaluar, Jibril Rajoub, sekretari i përgjithshëm i Komitetit Qendror të Fatahut, pranoi në një intervistë me televizionin zyrtar palestinez ekzistencën e presioneve nga Izraeli dhe disa vendeve arabe për t’i anuluar zgjedhjet.
“Në pamundësi për të formuar qeverinë, Izraeli në telashe”
Duke komentuar mbi zgjedhjet në Izrael, Haniyeh tha se vendi është në “telashe të vërtetë”, pasi janë në pamundësi për të formuar një qeveri dhe përballet me mundësinë e raundit të pestë të zgjedhjeve në dy vitet e ardhshme.
“Subjekti izraelit nuk është më i fortë dhe imun”, tha ai, duke shtuar se kjo tregon se izraelitët nuk kanë të ardhme në tokën palestineze.
Zgjedhjet në Izrael që u zhvilluan në fund të muajit të kaluar përfunduan pa asnjë bllok me mundësi për të arritur pragun e kërkuar për të formuar qeverinë.
Vlerësohet mbështetja e Turqisë për çështjen palestineze
Duke adresuar gjithashtu mbështetjen e palëkundur të Turqisë për Palestinën, kreu i byrosë politike të Hamasit gjithashtu vlerësoi rolin e Ankarasë në mbështetjen e çështjes palestineze, duke qëndruar pranë Gazës përballë bllokadës së Izraelit dhe duke mbrojtur Kudsin si kryeqytetin e Palestinës.
“Ne me krenari dëshmuam pozicionet politike të presidentit Recep Tayyip Erdoğan, parlamentit dhe qeverisë në forume rajonale dhe ndërkombëtare”, deklaroi Haniyeh.
Haniyeh ritheksoi paralajmërimin e tij rreth rrezikut të normalizimit të marrëdhënieve midis disa vendeve arabe dhe Izraelit.
Bllokada e Gazës
Duke folur për rrethimin izraelit të vendosur në Rripin e Gazës, Haniyeh e përshkroi atë si “më të gjatën që i nënshtrohen njerëzit nën okupim”.
Ai tha se Gaza ka qenë prej kohësh e nënshtruar ndaj luftërave shkatërruese që morën mijëra dëshmorë, shkatërruan shtëpi dhe infrastrukturë, krijuan kushte të vështira jetese dhe papunësi të përhapur. Pandemia e koronavirusit ka përkeqësuar situatën në rrip për shkak të burimeve të pakta, shtoi ai.
Haniyeh denoncoi “politizimin” e vaksinave të koronavirusit nga Izraeli, duke refuzuar t’u japë doza palestinezëve pavarësisht pushtimit të tyre.
Ai lavdëroi planet nga presidentit turk Recep Tayyip Erdoğan për të ofruar vaksinën e brendshme të vendit të tij për të gjithë njerëzimin në kushtet më të përshtatshme kur të përfundojë puna për vaksinën potenciale.
Në një video-mesazh të martën duke u adresuar në një takim të OKB-së, Erdoğan tha se gati 100 vende nuk kanë ende qasje në vaksinat kundër COVID-19, duke e përshkruar çështjen si “alarmante” për njerëzimin dhe vlerat njerëzore.
Haniyeh veçoi Turqinë dhe Katarin me lavdërime për përpjekjet e tyre për të ndihmuar Rripin e Gazës, ndërsa gjithashtu falënderoi Egjiptin për hapjen e vendkalimit kufitar Rafah për tregti dhe pasagjerë.
