Mbyllja e hapësirës ajrore pas sulmit iranian shkaktoi kolaps në trafikun ajror në Lindjen e Mesme.
Më shumë se 25.000 pasagjerë mbetën të bllokuar në aeroportet e Dohas dhe Dubait pasi Katari, Bahrejni dhe Kuvajti vendosën të mbyllin përkohësisht hapësirën ajrore, për shkak të tensioneve të shkaktuara nga sulmi i fundit i Iranit ndaj një baze ushtarake amerikane në Doha.
Trafiku ajror në gjithë rajonin u paralizua, ndërsa aeroportet Hamad në Doha dhe Aeroporti Ndërkombëtar i Dubait dy nga më të ngarkuarit në botë – u përballën me një fluks të jashtëzakonshëm udhëtarësh që përballeshin me anulime dhe vonesa të shumta.
Sipas të dhënave nga faqja FlightRadar24, në aeroportin Hamad u anuluan rreth 250 fluturime, ndërsa 238 të tjera u vonuan. Në Dubai, të paktën 145 fluturime u anuluan, dhe më shumë se 450 pësuan vonesa.
Udhëtarët kanë pritur me orë të tëra, ndërsa dëshmitarë raportojnë për tensione dhe përplasje mes radhëve të gjata. “Nuk kam fjetur prej 19 orësh. Jam në këtë radhë për më shumë se nëntë orë,” tha Lily Rogers, një pasagjere 21-vjeçare nga Australia.
Kompania ajrore Qatar Airways njoftoi se po punon për të rikthyer gradualisht orarin e saj, por paralajmëroi se prishjet mund të zgjasin deri më 26 qershor.
Ndërkohë, autoritetet e aeroporteve në Dubai dhe zyra mediatike e qeverisë nuk dhanë komente zyrtare. Megjithatë, duke pasur parasysh përmasat e vonesave dhe numrin e fluturimeve të prekur, pritet që sfidat operacionale të vazhdojnë për disa ditë.
Kjo situatë është një dëshmi e re se sa i ndjeshëm është trafiku ajror global ndaj krizave të sigurisë dhe tensioneve gjeopolitike – veçanërisht në rajone si Lindja e Mesme, ku interesat civile dhe ushtarake shpesh përplasen.
