“E falënderova për gatishmërinë e Turqisë për të marrë një rol ndërmjetësues, duke përfshirë edhe vënien në dispozicion të Stambollit ose Ankarasë si vende për një takim të tillë”, tha Merz, duke iu referuar takimit me presidentin Erdoğan
Kancelari gjerman, Friedrich Merz, ka vlerësuar përpjekjet diplomatike të Turqisë për një armëpushim të mundshëm dhe një marrëveshje të paqes midis Rusisë dhe Ukrainës, raporton Anadolu.
Duke folur në një konferencë për media pas samitit të NATO-s në Hagë, kancelari Merz tha se zhvilloi një takim të gjatë dypalësh me presidentin turk, Recep Tayyip Erdoğan, në margjinat e samitit për të diskutuar konfliktin në Ukrainë dhe çështje të tjera ndërkombëtare.
“E falënderova për gatishmërinë e Turqisë për të marrë një rol ndërmjetësues, duke përfshirë edhe vënien në dispozicion të Stambollit ose Ankarasë si vende për një takim të tillë”, tha Merz.
“Gjithashtu u kërkova presidentit Erdoğan të ushtrojë ndikim mbi Rusinë dhe presidentin rus që të ulen në tryezën e negociatave në mënyrë që, pas këtyre tre viteve e gjysmë të tmerrshme lufte në Ukrainë dhe gjakderdhjes atje, më në fund të arrihet një zgjidhje paqeje”, shtoi ai.
Kancelari gjerman tha se Ukraina gjithashtu ishte një nga temat më të rëndësishme që diskutoi me presidentin e SHBA-së, Donald Trump, gjatë takimit të tyre dypalësh në Hagë.
Ai tha se kërkoi nga presidenti amerikan të mbështesë sanksione të mëtejshme ndaj Rusisë për të rritur presionin mbi Kremlinin për të ndërmarra hapa drejt një zgjidhjeje diplomatike.
“Ia përcolla edhe një herë, në lidhje me situatën në Ukrainë, dëshirën tonë urgjente që pala amerikane të vendosë sanksione të mëtejshme kundër Rusisë. Nuk do të ketë zgjidhje ushtarake për këtë konflikt. Ne duhet të rrisim presionin ekonomik mbi Moskën”, theksoi ai.
Ai gjithashtu theksoi se BE-ja më në fund nesër do të miratojë paketën e saj të 18-të të sanksioneve kundër Rusisë, por pranoi se kjo nuk do të jetë e mjaftueshme. Ai tha se evropianët kanë nevojë për mbështetjen e SHBA-së për të krijuar presion efektiv mbi Rusinë.
“Një paketë sanksionesh mund të votohet në Senatin e SHBA-së në ditët në vijim. E kam inkurajuar edhe një herë presidentin Trump ta miratojë këtë në mënyrë që Amerika të ushtrojë presion më të madh mbi Moskën, në mënyrë që Moska të kthehet në tryezën e negociatave”, tha Merz.
