Shtatë ushtarë izraelitë janë vrarë dhe rreth 17 të tjerë janë plagosur, disa prej tyre rëndë, pasi ranë në një pritë të ndërlikuar në Khan Younis, në jug të Rripit të Gazës, raportuan të martën mbrëma mediat izraelite.
Sipas detajeve, burime izraelite njoftuan se viktimat përfshinin pjesëtarë të dy njësive ushtarake nga brigada dhe formacione të ndryshme. Raportet gjithashtu theksojnë se disa ushtarë ende rezultojnë të zhdukur në fushëbetejë, duke ngritur shqetësime serioze për fatin e tyre. Helikopterë ushtarakë kanë evakuuar të plagosurit drejt spitalit Tel HaShomer në Tel Aviv.
Mediat izraelite e përshkruan incidentin si “të vështirë për t’u kuptuar”, duke pasur parasysh se si të vrarët ashtu edhe të plagosurit ishin nga dy njësi të ndryshme.
Sipas raportimeve, luftëtarët palestinezë kishin ngritur një pritë të sofistikuar kundër forcave izraelite, duke djegur një transporter të blinduar tip Puma ndërsa ushtarët ndodheshin ende brenda.
Në një video të regjistruar nga luftëtarët e Hamasit, dëgjohen britmat e të plagosurve përpara se të niste një pritë e dytë kundër ekipit të shpëtimit.
Raportet izraelite kanë konfirmuar se familjet e ushtarëve të vrarë janë njoftuar dhe se disa nga të plagosurit ndodhen ende në gjendje kritike.
Më pas, komanda ushtarake izraelite deklaroi se shtatë ushtarë nga batalioni inxhinierik 605, përfshirë një oficer toge, janë vrarë gjatë një sulmi që kishte në shënjestër transporterin e blinduar në jug të Rripit të Gazës.
Po ashtu, autoritetet njoftuan vdekjen e një ushtari tjetër nga Njësia Multidimensionale, njësia speciale e forcave të armatosura izraelite, si pasojë e një sulmi balistik iranian në Bir al-Sabee’.
Kështu, numri i ushtarëve izraelitë të vrarë që nga 7 tetori 2023 është rritur në 879.
Në një kontekst të lidhur, brigadat al-Qassam të Hamasit konfirmuan se luftëtarët e tyre kishin organizuar një pritë të ndërlikuar ndaj forcave izraelite që ishin strehuar në një shtëpi, duke përdorur një granatë al-Yassin 105 dhe RPG në jug të Khan Younisit.
Brigadat thanë se kanë shkaktuar viktima midis ushtarëve armik, të vrarë dhe të plagosur, në zonën në jug të Khan Younisit.
Gjithashtu, al-Qassam deklaroi se luftëtarët e saj kishin goditur një tank izraelit Merkava me një mjet shpërthyes Shawaz dhe një granatë al-Yassin 105, po në jug të Khan Younisit.
