Ministri i Mbrojtjes i Izraelit, Yisrael Katz, ka kërcënuar se do të konfiskojë anijet që do të afrohen në brigjet e Gazës për të mbështetur palestinezët dhe se ato do të përdoren për dëbimin e banorëve të Gazës.
Sipas një deklarate të lëshuar nga Ministria e Mbrojtjes së Izraelit, Katz njoftoi se çdo anije që do të përpiqet të arrijë në brigjet e Gazës për të mbështetur palestinezët do të sekuestrohet.
“DO T’I PËRDORIM ANIJET PËR DËBIM”
“Çdokush që vjen për të bërë shfaqje në brigjet e Gazës, ne do ta dërgojmë në Gaza,” thuhet në deklaratë, ku shtohet se anijet do të përdoren për të dëbuar banorët e Gazës.
Në deklaratë theksohet gjithashtu se Katz ka dhënë urdhër ushtrisë izraelite që të lejojë flotat që mbështesin palestinezët të mbërrijnë në brigjet e Gazës. Ai ka urdhëruar gjithashtu që aktivistët pro-palestinezë të zbarkohen në Gaza, ndërsa anijet të konfiskohen dhe të dërgohen në portin e Ashdodit për të ndihmuar në evakuimin e palestinezëve që duan të largohen nga Gaza.
PRITET MBËRRITJA E FLOTES SË NDIHMËS PËR GAZËN
Sipas gazetës The Jerusalem Post, Katz ka mbajtur sot një takim me zyrtarë të lartë të ushtrisë izraelite dhe shërbimit të inteligjencës së brendshme Shin Bet.
Gjatë takimit, është diskutuar mbi pritjen e një flote që synon të arrijë në brigjet e Gazës për të mbështetur popullin palestinez.
Kujtojmë se prillin e vitit të kaluar, dy anije ndihmash u nisën nga porti i Larnakës në Qipro për të dërguar ndihma humanitare në Gazën e rrethuar, e cila ndodhet nën bllokadë detare, tokësore dhe ajrore, duke e lënë popullsinë përballë urrejtjes, urisë dhe katastrofës humanitare.
