Ministri amerikan i Mbrojtjes, Pete Hegseth, reagoi ashpër ndaj pyetjeve të gazetarëve në një konferencë për shtyp të mbajtur pas samitit të NATO-s në Hagë, duke komentuar të dhënat e inteligjencës që janë publikuar në disa media amerikane.
I dukshëm i revoltuar, Hegseth tha se ekziston një arsye pse presidenti amerikan i quan këto media “lajme të rreme”.
“Ka një arsye pse quhen ‘fake news’. Këta pilotë, këta luftëtarë, fluturuan për 36 orë dhe shkatërruan programin bërthamor të Iranit. Instinktivisht, CNN dhe New York Times po përpiqen ta paraqesin ndryshe për arsye politike dhe për të dëmtuar presidentin dhe vendin tonë,” tha ai.
Ai shtoi se informacioni i publikuar kishte etiketën “Low Confidence” (Besueshmëri e ulët), që sipas tij nuk do të thotë se është i pasaktë, por se pjesa tjetër e provave “është varrosur nën një mal”.
“Kushdo që do t’i gjejë ato, do të duhet të marrë një lopatë të madhe dhe të gërmojë thellë. Programi bërthamor iranian është shkatërruar. Ata që hodhën bombat me saktësi, e dinë mirë çfarë ndodhi atje. E di edhe Irani,” përfundoi Hegseth.
