Kryeministri hungarez Viktor Orbán, që nga viti 2010 udhëheq pa ndërprerje qeverinë e Hungarisë, mund të mos jetë më lideri i ardhshëm i partisë Fidesz në zgjedhjet e ardhshme – kështu spekulojnë gjithnjë e më shumë mediat dhe burime politike në vend.
Sipas disa raporteve, madje ekziston mundësia që Orbán të japë dorëheqje nga posti i kryeministrit edhe gjatë këtij mandati. Megjithëse Fidesz i mohon kategorikisht këto pohime, tensionet dhe kundërshtimet ndaj Orbánit po ndihen tashmë brenda vetë partisë.
Kandidati i ri: János Lázár?
Mediat hungareze përmendin si zëvendësues të mundshëm të Orbánit ministrin e ndërtimit dhe transportit, János Lázár. Sipas portalit index.hu, Lázár mund t’i japë qeverisë dhe Fidesz-it më shumë fleksibilitet politik dhe një imazh më të moderuar.
“Ai është një nga të paktët që kritikoi publikisht ligjin më të diskutueshëm të fundit – ligjin për transparencën – dhe refuzoi ta nënshkruajë. Mund të sjellë një politikë të re. Lázár mund të rindërtojë marrëdhëniet me Bashkimin Evropian,” – shkruan index.hu.
Nëse ai ndërmerr hapa më miqësorë ndaj BE-së, Hungaria mund të përfitojë me deblokimin e fondeve evropiane, diçka që do të ndjehej pozitivisht nga fillimi i vitit të ardhshëm – periudhë vendimtare para zgjedhjeve të prillit.
Një rikonfigurim strategjik?
Lázár është përshkruar si një figurë më e hapur dhe komunikative, i pranishëm shpesh në publik dhe në ngjarje nën simbolikën e Fidesz-it. Përkundrazi, Orbán është tërhequr nga skena publike, duke marrë pjesë vetëm në mbledhje të mbyllura të partisë.
Sipas analizave, Orbán mund të qëndrojë ende si lider formal i Fidesz-it, për të ruajtur stabilitetin e strukturës së pushtetit, ndërsa Lázár do të ketë rolin operativ për të ndaluar përparimin e opozitës së Péter Magyar dhe partisë së tij Tisza.
“Nëse Fidesz humb zgjedhjet vitin tjetër, fajin mund ta marrë Lázár, ndërsa Orbán do të ruajë aurën e fitimtarit,” – thekson portali.
Çfarë thonë sondazhet?
Këto skenarë lidhen me faktin se Orbán nuk shihet më si garancia absolute e fitores për Fidesz, pasi sipas sondazheve, partia opozitare Tisza e Péter Magyar ka epërsi të qëndrueshme.
