Gjykata Supreme të mërkurën hodhi poshtë kërkesën e Administratës Trump për të mbajtur të ngrirë miliarda dollarë ndihmë të huaj të miratuar nga Kongresi.
Megjithatë, gjykata nuk tha menjëherë se kur duhet të lirohen paratë, duke lejuar Shtëpinë e Bardhë të vazhdojë të kundërshtojë çështjen në gjykatat më të ulëta.
Vendimi i gjykatës ishte i ndarë 5 me 4, shkruan CNN, transmeton Gazeta Express.
Urdhri ishte i panënshkruar, por katër gjyqtarë konservatorë kundërshtuan – Samuel Alito, Clarence Thomas, Neil Gorsuch dhe Brett Kavanaugh. Ndërsa pesë gjyqtarët shumicë ishin kryegjykatësi John Roberts, Amy Coney Barrett, Elena Kagan, Sonia Sotomayor dhe Ketanji Brown Jackson.
Shumica vuri në dukje se duke qenë se një afat i urdhëruar nga gjykata për të shpenzuar paratë javën e kaluar kishte kaluar tashmë, gjykatat më të ulëta duhet të “qartësojnë se çfarë detyrimesh duhet të përmbushë qeveria për të siguruar respektimin e urdhrit të ndalimit të përkohshëm”.
Në qendër të çështjes janë miliarda ndihma të huaja nga Departamenti i Shtetit dhe Agjencia Amerikane për Zhvillim Ndërkombëtar, të cilat Trump i ngriu në janar, ndërsa u përpoq të shtrëngonte shpenzimet dhe t’i sillte ato agjenci në përputhje me agjendën e tij.
Disa grupe jofitimprurëse që mbështeten në financimin për shëndetin global dhe programe të tjera e paditën, duke pohuar se lëvizjet e administratës uzurpuan fuqinë e Kongresit për të kontrolluar shpenzimet e qeverisë dhe shkelën një ligj federal që dikton se si agjencitë marrin vendime.
Në një përmbledhje të së premtes, grupet i përshkruan veprimet e administratës si një ndikim “shkatërrues”.
