Inspektori i përgjithshëm i mbrojtjes së Gjermanisë, gjenerali Carsten Breuer, paralajmëroi se shtetet anëtare të NATO-s duhet të përgatiten për një sulm të mundshëm nga Rusia brenda katër viteve të ardhshme.
Në një intervistë për BBC, Breuer theksoi se Rusia po prodhon qindra tanke çdo vit, dhe shumë prej tyre mund të përdoren për një sulm ndaj shteteve balltike, anëtare të NATO-s, deri në vitin 2029 – ose edhe më herët.
Ai gjithashtu insistoi që NATO të qëndrojë e bashkuar në qëndrimin e saj ndaj luftës në Ukrainë, pavarësisht dallimeve të fundit të shprehura nga Hungaria dhe Sllovakia.
Duke folur në margjinat e dialogut të Shangri-La, një samit mbi çështjet e mbrojtjes në Singapor, Breuer paralajmëroi se NATO po përballet me një “kërcënim shumë serioz” nga Rusia, një kërcënim që nuk e ka parë kurrë më parë në 40 vitet e tij të shërbimit.
Ai theksoi se Rusia po forcon forcat e saj “në përmasa të mëdha”, duke prodhuar rreth 1.500 tanke luftarake të rëndësishme çdo vit.
“Nuk shkon çdo tank në luftë në Ukrainë – një pjesë grumbullohet si rezervë ose dërgohet në struktura të reja ushtarake që gjithmonë janë të drejtuara kah Perëndimi. Rusia gjithashtu prodhoi katër milionë predha artilerie kalibri 152 mm vetëm në vitin 2024, dhe jo të gjitha u dërguan në Ukrainë,” tha ai.
Sipas tij, ekziston një “qëllim i qartë” dhe “grumbullim i rezervave” për një sulm të mundshëm në shtetet balltike të NATO-s.
Frika e një sulmi ndaj një vendi anëtar të NATO-s buron nga mundësia që ai të përshkallëzohet në një luftë më të gjerë mes Rusisë dhe SHBA-së, si anëtare kryesore e NATO-s. Sipas nenit 5 të traktatit të NATO-s, një sulm ndaj një anëtari nënkupton që të gjitha shtetet e tjera duhet të ndërhyjnë në mbrojtje të tij.
Gjenerali Breuer përmendi të ashtuquajturin “korridori Suwalski” – një zonë strategjike ndërmjet Lituanisë dhe Polonisë që kufizohet me Rusinë dhe Bjellorusinë – si një nga pikat më të cenueshme të aleancës.
“Vendet balltike janë vërtet të ekspozuara ndaj Rusisë, apo jo? Dhe kur ndodhesh atje, e ndjen realisht… në bisedat që bëjmë me njerëzit në terren,” tha ai.
Sipas Breuerit, estonezët e përshkruajnë situatën si “të jesh afër zjarrit – ndjen nxehtësinë, sheh flakën dhe nuhat tym”, ndërsa në Gjermani “shihni pak tym në horizont dhe asgjë më shumë”.
Ai tha se kjo tregon për perspektiva të ndryshme brenda shteteve evropiane rreth kërcënimit të një sulmi të mundshëm rus. Rusia, sipas tij, e sheh ndryshe luftën në Ukrainë nga Perëndimi dhe është vazhdimisht duke kërkuar mënyra për të depërtuar në linjat mbrojtëse perëndimore dhe për t’i testuar ato.
Ai përmendi si shembull sulmet e fundit ndaj kabllove nëndetare në Detin Baltik, sulmet kibernetike ndaj transportit publik në Evropë dhe dronët e paidentifikuar të vërejtur mbi termocentralet dhe infrastrukturën tjetër në Gjermani.
Breuer bëri thirrje që shtetet anëtare të NATO-s të fillojnë menjëherë forcimin e ushtrive të tyre dhe paralajmëroi se do të duhen vite të tëra që baza ushtarako-industriale evropiane të arrijë kapacitetin e prodhimit të armëve që aktualisht ka Rusia.
