Galatasaray festoi sërish fitimin e titullit të kampionit të Superligës dhe Kupës së Turqisë pas ndeshjes kundër Başakşehir-it.
Në javën e 38-të dhe të fundit të Superligës, Galatasaray mposhti Başakşehir-in në fushën e vet me rezultat 2-0 dhe përfundoi sezonin me fitore.
Pas përfundimit të ndeshjes, në Kompleksin Sportiv Ali Sami Yen u mbajtën festimet e kampionatit.
U MBAJT NJË SHFAQJE ME DRONË
Me përfundimin e ndeshjes, në fushë u pasqyrua logoja e Galatasarayt me 5 yje dhe më pas, përreth stadiumit u krijuan imazhe me dronë.
PLATFORMA U NDËRTUA NË QENDËR TË FUSHËS
Në qendër të fushës u ngrit një platformë, ku me radhë u thirrën dhe dolën në fushë anëtarët e bordit drejtues, punonjësit e klubit, stafi teknik dhe lojtarët.
TË GJITHË U PREZANTUAN NJË E NGA NJË
Trajneri Okan Buruk hyri në fushë me këngën e Kenan Doğulu “Rütbeni Bileceksin”.
Dries Mertens, i cili luajti ndeshjen e fundit me Galatasaray-in, zuri vendin e tij në platformë me entuziazëm të madh. Vëmendje tërhoqi edhe vendosja e djalit të tij Ciro brenda kupës së fituar.
Barış Alper Yılmaz u ngjit në skenë me këngën “Katulu Katula” të Davut Güloğlu. Pas këtyre momenteve, lojtarët verdhekuq zbritën nga platforma dhe vrapuan drejt Barış Alperit që kërceu horë në fushë, duke iu bashkuar atij.
Sulmuesi i ekipit, Victor Osimhen, hyri në fushë me këngën “Yarim yarim”. Në atë moment, tifozët e Galatasaray-t brohorisnin “Tifozët janë çmendur, duan Osimhen-in”.
Anëtarët e tjerë të ekipit dolën në fushë një nga një. Kapiteni Abdülkerim Bardakcı u prezantua nga Yunus Akgün dhe hyri në fushë me këngën “Vidrado Em Voce (Pode Sentar)”.
I dashuri i tifozëve të Galatasarayt, Mauro Icardi, doli në skenë me këngën “Aşkın olayım”. Entuziazmi i madh i tifozëve në momentin që ai hyri në fushë nuk kaloi pa u vënë re.
MUSLERA U PËRCOLL NË KRAHË DHE DHA LAMTUMIRËN
Portieri i përvojshëm i ekipit verdhekuq, Fernando Muslera, i cili luajti ndeshjen e tij të fundit me fanellën e Galatasarayt, ishte i fundit që doli në fushë.
Gjatë shpalljes së emrit të Muslerës, në ekran u shfaqën disa tifozë që nuk i përmbajtën lotët.
Muslera u mor mbi supe nga shokët e skuadrës dhe u hodh në ajër.
Duke iu drejtuar tifozëve, Muslera tha: “Faleminderit të gjithëve. Shumë faleminderit. Ju dua.”
Tifozët verdhekuq brohoritën gjatë për portierin uruguaian.
Pas daljes së Muslerës në skenë, futbollistët ngritën fillimisht Kupën e Turqisë, e më pas edhe trofeun e kampionatit.
Më pas, ata e ndanë gëzimin e kampionatit me tifozët e tyre.
