Izraeli liroi 642 të burgosur palestinezë të enjten pasi Hamasi dorëzoi trupat e katër robërve izraelitë sipas marrëveshjes së armëpushimit të Gazës dhe shkëmbimit të të burgosurve
Monitoruesi Euromesdhetar i të Drejtave të Njeriut (Euro-Med Monitor) është shprehur i tronditur për kushtet fizike dhe psikologjike të të burgosurve palestinezë të liruar së fundmi në raundin e shtatë të marrëveshjes së shkëmbimit të të burgosurve midis Hamasit dhe Izraelit, transmeton Anadolu.
“Lirimi i qindra të burgosurve dhe të arrestuarve palestinezë nga Izraeli, të cilët mbërritën në Rripin e Gazës së fundmi me shëndet jashtëzakonisht të dobët, ilustron përdorimin e vazhdueshëm të torturës për të terrorizuar dhe përndjekur të burgosurit dhe për të thyer vullnetin e tyre deri në fund të periudhës së ndalimit të tyre”, thuhet në një deklaratë të organizatës jofitimprurëse me bazë në Gjenevë.
“Lirimi i përsëritur i individëve të tillë dukshëm jo të shëndetshëm nga burgjet izraelite zbulon se torturat e tmerrshme dhe neglizhenca mjekësore e qëllimshme që ata durojnë janë përshkallëzuar në nivele të tmerrshme”, shtoi ajo.
“Euro-Med Monitor” tha se “edhe pse shumica e të burgosurve nuk u akuzuan për ndonjë krim specifik, shumë prej tyre pretenduan se ishin rrahur, keqtrajtuar dhe kërcënuar deri në minutën e fundit para lirimit të tyre”.
Ai theksoi se Izraeli “duhet të ndalojë menjëherë krimin e tij të zhdukjes me forcë kundër të burgosurve dhe të arrestuarve palestinezë nga Rripi i Gazës; të zbulojë të gjitha kampet sekrete të paraburgimit; (dhe) të zbulojë emrat, vendndodhjen dhe fatet e të gjithë palestinezëve që mban nga Rripi i Gazës”.
Izraeli liroi 642 të burgosur palestinezë të enjten pasi Hamasi dorëzoi trupat e katër robërve izraelitë sipas marrëveshjes së armëpushimit të Gazës dhe shkëmbimit të të burgosurve.
Marrëveshja ka qenë në fuqi që nga muaji i kaluar, duke ndalur luftën shkatërruese të Izraelit në Gaza, e cila ka vrarë më shumë se 48.360 palestinezë, kryesisht gra dhe fëmijë, dhe e ka lënë enklavën në gërmadha.
Deri më tani, 25 robër izraelitë dhe tetë trupa janë kthyer nga Gaza në këmbim të mbi 1.100 të burgosurve palestinezë sipas fazës së parë të marrëveshjes së Gazës.
Izraeli vlerëson se 59 pengje ende mbahen në Gaza, me të paktën 20 prej tyre të gjallë, dhe ata pritet të lirohen në fazën e dytë të armëpushimit, sipas së cilës Izraelit duhet të tërheqë plotësisht forcat e tij nga Gaza dhe t’i japë fund luftës përgjithmonë.
Nëntorin e kaluar, Gjykata Ndërkombëtare Penale (GJNP) lëshoi urdhra arresti për kryeministrin izraelit, Benjamin Netanyahu dhe ish-ministrin e tij të Mbrojtjes, Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një çështje gjenocidi në Gjykatën Ndërkombëtare të Drejtësisë (GJND) për luftën e tij në enklavën palestineze.
