Kancelari gjerman Olaf Scholz dhe presidenti francez Emmanuel Macron do të kenë një darkë të përbashkët në Paris sonte, ku do të diskutojnë marrëdhëniet Bashkimi Evropian-Kinë, si dhe politikat e Bashkimit.
Ky takim, i mbështjellë me fshehtësi, do të zhvillohet pak ditë para vizitës së presidentit kinez Xi Jinping në Evropë dhe karakterizohet si një takim gjysmë privat. Përveç liderëve të dy vendeve, në darkën në një restorant të Parisit do të jenë edhe bashkëshortja e Scholz, Britta Ernst dhe bashkëshortja e Macron, Brigitte. Scholz dhe gruaja e tij janë me pushime të shkurtra në kryeqytetin francez.
Sipas tre personave me njohuri për darkën, identitetet e të cilëve nuk janë bërë të ditur, asnjë këshilltar nuk do të marrë pjesë në darkë.
Scholz dhe Macron kohët e fundit kanë pasur disa pikëpamje të kundërta, dhe ndër më të fundit është ajo që lidhet me dërgimin e ushtrisë tokësore në Ukrainë. Macron deklaroi se ekzistonte mundësia e dërgimit të trupave tokësore, gjë që Scholz e refuzoi.
Në fokus të bisedës së tyre do të jetë turneu evropian i presidentit kinez, i cili do të zhvillojë një vizitë treditore në Francë, e më pas do të vizitojë Serbinë dhe Hungarinë. Sipas revistës së politikës së jashtme Politico, darka do të jetë një mundësi për Scholz që të informojë Macron për takimin me Xi muajin e kaluar në Pekin.
Scholz dhe Macron gjithashtu nuk pajtohen nëse BE duhet të vendosë tarifa për automjetet elektrike kineze të subvencionuara.
Noah Barkin i fondit gjerman Marshall theksoi se presidenti francez do të përpiqet të bindë kancelaren gjermane që t’i bashkohet atij në një takim me presidentin kinez javën e ardhshme, së bashku me presidenten e Komisionit Evropian, Ursula von der Leyen.
Ka të ngjarë që Scholz dhe Macron të diskutojnë gjithashtu politikat e BE-së, veçanërisht në fushën e mbrojtjes dhe financave. Macron mbron që anëtarët e BE-së të detyrohen të ndajnë shpenzimet ushtarake, ndërsa Scholz e kundërshton këtë mundësi, shkruan Politico.
