Presidenti amerikan Donald Trump ka shprehur zemërim të thellë për vendimin e Ukrainës për të sulmuar aeroportet ushtarake ruse, raportoi The Atlantic duke cituar tre zyrtarë të administratës dhe një këshilltar të jashtëm të Shtëpisë së Bardhë.
Sipas raportit, Trump është indinjuar që Kievi ndërmori një veprim të tillë pa koordinim me Shtetet e Bashkuara, duke nxitur debat të ri brenda administratës për justifikimin e vazhdimit të ndihmës ushtarake dhe financiare për Ukrainën.
Burimet thonë se Trump ka rifilluar kritikat e tij personale ndaj presidentit ukrainas Volodymyr Zelensky, të cilin e ka quajtur “kokë të nxehtë” që, sipas tij, mund ta shtyjë botën drejt një Lufte të Tretë Botërore.
Ish-strategu i Trumpit, Steve Bannon, ka pyetur publikisht:
“Zelensky nuk e paralajmëroi Presidentin e SHBA-së që do të godiste thellë forcat strategjike të Rusisë, në një moment kur Moska po ngjitet me shpejtësi në shkallën e përshkallëzimit – vetëm një ditë para takimit tuaj në Turqi?”
Trump i ndarë mes admirimit dhe pakënaqësisë
Sipas këshilltarëve, Trump privatisht është impresionuar nga guximi i sulmeve ukrainase me dronë, por mendon se Zelensky duhet të ishte përqendruar te bisedimet me Rusinë që po zhvilloheshin në Stamboll.
Ai gjithashtu ka ndarë me rrethin e tij detaje nga biseda e fundit me presidentin rus Vladimir Putin, ku kishte sugjeruar që “të lejohej Ukraina dhe Rusia të luftonin për një kohë”, sepse kjo do ta bënte më të lehtë përfundimin e konfliktit më vonë.
Asnjë sanksion nëse rrezikohet marrëveshja?
Trump më herët kishte thënë se do të përmbahej nga vendosja e sanksioneve ndaj Rusisë, nëse do të besonte se ato do të pengonin arritjen e një marrëveshjeje paqeje.
