Sipas ministrit të Mbrojtjes, John Healey, Mbretëria e Bashkuar do të investojë 1.5 miliardë paund për ndërtimin e gjashtë fabrikave të reja të municionit artilerik, duke krijuar 1.800 vende të reja pune.
Gjatë një vizite në fabrikën në Stevenage, ku prodhohen raketat lundruese Storm Shadow, Healey deklaroi se qeveria do të mbështesë blerjen e deri në 7.000 copë të këtyre raketave të prodhuara në Britani.
Ministria e Mbrojtjes njoftoi se kjo paketë e re financimi do ta çojë shpenzimin total të Britanisë për municion gjatë këtij sesioni parlamentar në gjashtë miliardë paund.
“Gjashtë miliardë gjatë pesë viteve të ardhshme për fabrika si kjo – që na mundësojnë jo vetëm të pajisim forcat tona me municion për të ardhmen, por edhe të krijojmë vende pune në çdo cep të Mbretërisë së Bashkuar,” tha Healey.
Lufta në Ukrainë ka nxjerrë në pah mungesat serioze në kapacitetet e Perëndimit për të prodhuar armë dhe municion, dhe zyrtarët e lartë ushtarakë britanikë kanë paralajmëruar prej kohësh për nivelet e ulëta të rezervave.
“Kjo është një mesazh edhe për Moskën. Britania është e vendosur jo vetëm të forcojë forcat tona të armatosura, por edhe bazën tonë industriale – kjo është pjesë e përgatitjes sonë për luftë nëse është e nevojshme, por edhe forcë për të parandaluar konfliktet në të ardhmen,” përfundoi Healey.
