Rreth 4.500 marinarë amerikanë, të vendosur në bordin e grupit luftarak të aeroplanmbajtëses Gerald R. Ford, u nisën dje nga baza detare në Norfolk për një vendosje të planifikuar në zonën e përgjegjësisë së Komandës Evropiane të SHBA-së (EUCOM).
Sipas Marinës Amerikane, ky dislokim është pjesë e një misioni më të gjerë për të mbështetur sigurinë kombëtare, stabilitetin ekonomik dhe përpjekjet globale të parandalimit.
“Grupi luftarak i 12 aeroplanmbajtëseve është paketa më e aftë, më fleksibile dhe më vdekjeprurëse e misioneve detare në botë,” – deklaroi kontradmirali Paul Lanzilotta.
Aeroplanmbajtësja e klasës “Ford” është më modernja në flotën e Marinës Amerikane dhe mund të mbajë deri në 75 avionë, megjithëse ky numër ndryshon në varësi të misionit dhe përbërjes së grupit ajror.
“Forcat tona janë të gatshme dhe të pranishme për të kryer operacione të qëndrueshme detare në shumë fusha, kudo dhe kurdo që t’u jepet një detyrë, në mbështetje të sigurisë dhe prosperitetit ekonomik të SHBA-së,” – shtoi Lanzilotta.
Edhe pse Marina nuk ka specifikuar vendndodhjen përfundimtare të dislokimit, sipas praktikës së deritanishme dhe zhvillimeve në Lindjen e Mesme, Mesdheun Lindor dhe luftën në Ukrainë, ka gjasa që USS Ford dhe grupi shoqërues të vendosen në Mesdheun Lindor.
