Ministri i Mbrojtjes së Pakistanit, Khawaja Asif, shkaktoi tronditje në orët e para të mëngjesit të së martës në platformën X, kur shpërndau një intervistë të re të BBC-së me Reza Pahlavi, djalin e shahut të rrëzuar të Iranit, i cili publikisht kishte mbështetur sulmet izraelite ndaj Iranit.
“Ashtu siç thua ti që populli iranian është plot energji e motivim, atëherë kthehu dhe udhëhiqi që të rrëzojnë regjimin. Vëri paratë aty ku ke prapanicën, ti parazit i ndyrë, ku*vë imperialiste”, shkroi Asif.
Më befasues është fakti se ky postim, deri në orën 16:00 GMT të së martës, vazhdonte të ishte i dukshëm në profilin e tij zyrtar.
Sipas përdoruesve të rrjeteve sociale, postimi ishte ndryshuar nga forma origjinale, ku në vend të fjalës ofenduese përdorej termi “tradhtar”.
Reagimet ishin të menjëhershme.
Një sipërmarrës pakistanez i shkroi ministrit: “Zoti Asif, ju sugjeroj ta fshini këtë postim. Në këtë botë të paqëndrueshme, nuk e dimë kush do të jetë në pushtet nesër. Më mirë është të qëndroni neutral.”
Të tjerë kritikuan përmbajtjen politike të deklaratës. Megjithatë, kishte edhe nga ata që e mbështetën: “Ndonjëherë ministri ynë ka plotësisht të drejtë”, shkroi një përdorues.
Një tjetër komentoi: “Është e lehtë të bësh thirrje për revolucion nga luksin i mërgimit me gjak mbretëror, por pa guxim – duke predikuar për sakrificë ndërkohë që pi latte në Paris. Nëse të intereson vërtet, udhëhiq nga vijat e para, jo nga penthausi.”
Asif qëndroi pas fjalëve të tij.
“Është për të ardhur keq që disa shqetësohen për nuancat gjuhësore, ndërkohë që para syve të botës ‘të civilizuar’ po ndodh një gjenocid dhe mijëra fëmijë po masakrohen çdo ditë. Kjo nuk është darkë romantike ku rregullat e mirësjelljes vlejnë. Pahlavi mbështet Netanyahun, një maniak gjenocidal, dhe nuk meriton asgjë tjetër veç përçmimit”, tha ministri.
Kush është Reza Pahlavi?
Reza Pahlavi (64), i njohur mes mbështetësve si “mbreti në mërgim”, është djali i madh i Mohammad Reza Pahlavit – shahut të fundit të Iranit, i rrëzuar nga revolucioni popullor mes viteve 1977-1979, pas të cilit u themelua Republika Islamike.
Ai është një mbështetës i flaktë i rikthimit të monarkisë me ndihmën e SHBA-së. Ka vizituar disa herë Izraelin, është fotografuar me kryeministrin Benjamin Netanyahu dhe është paraqitur si lideri i vetëm i mundshëm për një Iran të ri nëse bie regjimi aktual.
Në intervistën me BBC të dielën, të cilën Asif e komentoi, Pahlavi u shpreh:
“Pas sulmit të parë izraelit, ndodhi shumëçka, veçanërisht nga vetë populli që është tani në rrugë – duket se janë rikthyer me energji, pasi e shohin këtë si mundësi për të ndryshuar regjimin që tashmë duket i dobët. Zgjidhja e vetme për Iranin dhe për botën e lirë është që ky regjim të mos ekzistojë më.”
Trump kërcënon drejtpërdrejt Khamenein
Të martën, ish-presidenti amerikan Donald Trump lëshoi një kërcënim të drejtpërdrejtë ndaj liderit suprem iranian, Ayatollah Ali Khamenei, përmes rrjetit TruthSocial, një ditë pasi Netanyahu tha se një atentat ndaj Khameneit do ta përfundonte konfliktin.
“E dimë saktësisht ku fshihet i ashtuquajturi ‘lider suprem’. Është një objektiv i lehtë, por i sigurt atje – nuk do ta eliminojmë (vrasim!), të paktën jo tani”, tha Trump.
Çfarë thonë kundërshtarët e regjimit iranian?
Sipas tyre, sulmet izraelite vetëm sa i kanë bashkuar iranianët. Çdo ndryshim, thonë ata, duhet të vijë nga brenda, në mënyrë organike – jo përmes ndërhyrjeve të huaja.
Pse është përfshirë Pakistani?
Islamabadi historikisht ka qenë përkrahës i të drejtave palestineze – në kontrast të plotë me Indinë fqinje, e cila mburret me lidhjet e saj ekonomike dhe ushtarake me Izraelin.
Ministri i Jashtëm pakistanez, Ishaq Dar, i quajti sulmet izraelite ndaj Teheranit “të pajustifikuara”, duke theksuar se Pakistani – që nuk e njeh Izraelin – qëndron “në solidaritet me Qeverinë dhe popullin e Iranit”.
Ministria e Jashtme pakistaneze deklaroi gjithashtu se sulmet izraelite përbëjnë “kërcënim serioz për paqen, sigurinë dhe stabilitetin e të gjithë rajonit dhe më gjerë”.
Por përfshirja pakistaneze nuk lidhet vetëm me qëndrimin ndaj Izraelit.
Në përballje me agresionin izraelit, Pakistani e sheh veten si mbrojtës të domosdoshëm të botës myslimane – duke qenë e vetmja shtet mysliman me armë bërthamore. Pakistani dhe Irani ndajnë gjithashtu histori bashkëpunimi në konflikte rajonale dhe tensione diplomatike.
Rreth 20% e popullsisë prej 230 milionësh të Pakistanit janë shiitë, dhe sipas disa sondazheve, shumica e qytetarëve pakistanezë kanë një perceptim pozitiv për Iranin.
