Katër anëtarë të lartë të rrethit të Donald Trumpit kanë zhvilluar bisedime sekrete me disa nga kundërshtarët kryesorë politikë të Volodimir Zelenskit në Kiev, pikërisht në momentin kur Uashingtoni po bie dakord me Moskën për përpjekjet për ta larguar presidentin ukrainas nga pushteti.
Aleatët e lartë të Trumpit kanë zhvilluar bisedime me lideren e opozitës ukrainase, Julia Timoshenko, ish-kryeministren ambicioze dhe të pamëshirshme, si dhe me anëtarë të lartë të partisë së Petro Poroshenkos, paraardhësit të drejtpërdrejtë të Zelenskit në postin e presidentit, sipas tre deputetëve ukrainas dhe një eksperti republikan amerikan për politikën e jashtme, raporton Politico.
Diskutimet janë përqendruar në mundësinë e mbajtjes së zgjedhjeve të shpejta presidenciale në Ukrainë. Këto zgjedhje janë shtyrë në përputhje me kushtetutën e vendit, pasi Ukraina mbetet në gjendje të jashtëzakonshme. Kritikët e mbajtjes së zgjedhjeve thonë se ato mund të jenë kaotike dhe të favorizojnë Rusinë, duke pasur parasysh që shumë votues të mundshëm janë në vijën e parë të frontit ose jetojnë jashtë vendit si refugjatë.
Bashkëpunëtorët e Trumpit janë të bindur se Zelenski do të humbiste çdo votë për shkak të lodhjes nga lufta dhe frustrimit të publikut ndaj korrupsionit të pakontrolluar. Në fakt, popullariteti i tij ka qenë në rënie për vite me radhë, megjithëse u rrit pas përplasjes së javës së kaluar në Zyrën Ovale, kur udhëheqësi ukrainas u përzu nga dhoma pasi u qortua nga presidenti Donald Trump dhe nënpresidenti JD Vance. Megjithatë, sondazhi më i fundit tregon se Zelenski ende ka një epërsi të qartë në garën presidenciale.
Qëndrimi zyrtar i administratës amerikane është se Trump nuk po ndërhyn në politikën e brendshme të Ukrainës. Këtë javë, sekretari i tregtisë Howard Lutnick mohoi që shefi i tij të ishte i përfshirë në politikën ukrainase, duke shtuar se Trump “dëshiron vetëm një partner për paqen”.
Megjithatë, sjellja e Trumpit dhe zyrtarëve të tij sugjeron të kundërtën. Trump e ka akuzuar Zelenskin se është “një diktator pa zgjedhje”, ndërsa drejtoresha e Inteligjencës Kombëtare, Tulsi Gabbard, e ka akuzuar në mënyrë të rreme Kievin për anulimin e zgjedhjeve.
Ndërsa ekipi i Trumpit mund të shpresojë që zgjedhjet ta fundosin Zelenskin, ai mbetet ende dukshëm më popullor se Timoshenko dhe Poroshenko.
Në një sondazh të kryer këtë javë nga agjencia britanike Survation, pas përplasjes në Shtëpinë e Bardhë, 44% e të anketuarve thanë se do ta mbështesnin Zelenskin për president.
Rivali i tij më i afërt, me një diferencë prej më shumë se 20 pikë përqindjeje, është Valerij Zaluzhni, ish-komandanti ushtarak që tani është ambasador i Ukrainës në Britani. Vetëm 10% e të anketuarve mbështetën Poroshenkon, i njohur si “Mbreti i çokollatës” për perandorinë e tij të ëmbëlsirave. Julia Timoshenko, ish-kryeministre, mori vetëm 5.7% të mbështetjes.
