Departamenti Amerikan i Shtetit njoftoi se Uashingtoni do të fillojë menjëherë dërgimin e të dhënave të inteligjencës dhe do të vazhdojë ndihmën e sigurisë për Ukrainën. Nga ana tjetër, Ukraina pranoi një armëpushim të menjëhershëm 30-ditor.
Deklarata e Departamentit të Shtetit, e cituar nga Reuters, vjen pas një takimi të gjatë mes zyrtarëve të lartë amerikanë dhe ukrainas sot në Arabinë Saudite. Takimi në Xheda zgjati më shumë se tetë orë.
Ukraina pranoi të pranonte propozimin e SHBA-së për një ndërprerje të menjëhershme 30-ditore të luftimeve dhe të ndërmarrë hapa drejt rivendosjes së një paqeje të qëndrueshme pas pushtimit rus, thuhet në deklaratën e përbashkët të SHBA-së dhe Ukrainës të martën.
“Shtetet e Bashkuara të Amerikës do t’i përcjellin Rusisë se reciprociteti është çelësi për arritjen e paqes”, thuhet në deklaratë.
Dy palët, të cilat u takuan në Arabinë Saudite, gjithashtu ranë dakord që sa më shpejt të jetë e mundur të nënshkruajnë një marrëveshje gjithëpërfshirëse për zhvillimin e burimeve minerale kritike të Ukrainës, thuhet në deklaratë.
Sekretari Amerikan i Shtetit, Marco Rubio, deklaroi se SHBA-ja paraqiti një propozim për armëpushim, të cilin Ukraina e pranoi.
“Ne ofruam një propozim për të hyrë në një armëpushim dhe për të filluar negociatat për t’i dhënë fund këtij konflikti në një mënyrë të qëndrueshme dhe të përhershme”, tha Rubio për gazetarët pas takimit me delegacionin ukrainas.
