Kompania Uber është urdhëruar t’i paguajë 40 milionë dollarë familjes së 23-vjeçares Emily Normandin-Parker, e cila humbi tragjikisht jetën në një autostradë në Kaliforni pasi shoferi e nxori nga automjeti gjatë një udhëtimi natën.
Tragjedia ndodhi në gusht të vitit 2023, kur Emily dhe shoqja e saj porositën një udhëtim me Uber për të mos drejtuar automjetin nën ndikimin e alkoolit. Gjatë rrugës, shoqes së saj iu përkeqësua gjendja dhe ajo vjelli në automjet. Pas kësaj, shoferi Vu Tran i detyroi të dyja të dilnin nga makina në mes të autostradës.
Pak çaste më vonë, 23-vjeçarja u godit për vdekje nga një automjet tjetër.
Gjyqtari në pension Richard Stone vendosi për dëmshpërblimin pas një procedure arbitrazhi pesëditore. Gjatë procesit u zbuluan hollësi tronditëse për veprimet e shoferit.
Pasi i la vajzat në një pjesë të rrezikshme të autostradës, shoferi nuk kërkoi ndihmë. Në vend të kësaj, ai ndaloi për të kontaktuar Uberin dhe për të kërkuar pagesën e tarifës për pastrimin e automjetit.
Gjyqtari theksoi se shoferi kishte treguar shumë më tepër kujdes për makinën sesa për pasagjeret dhe se mund të kishte dalë në daljen e parë nga autostrada për t’i lënë ato në një vend të sigurt.
Zyra ligjore që përfaqëson familjen bëri të ditur se Uberi fillimisht kishte ofruar 10 milionë dollarë, me kusht që prindërit të nënshkruanin një marrëveshje konfidencialiteti dhe të mos flisnin për incidentin. Familja e refuzoi ofertën.
