Kompania Fergani Space Technologies ka lansuar me sukses satelitin e saj të dytë të prodhuar plotësisht në Turqi – FGN-100-D2, përmes raketës SpaceX Falcon 9. Ky mision përfaqëson anijen më të madhe kozmike private turke që ka arritur orbitën dhe është një hap i rëndësishëm drejt krijimit të sistemit kombëtar të navigimit satelitor.
Satelit turk në orbitë me sukses
Sipas njoftimit të kompanisë, sateliti FGN-100-D2, me peshë 104 kilogramë, u nis në orën 08:09 (sipas orës së Turqisë) më 2 nëntor 2025 nga platforma SLC-40 e Cape Canaveral, si pjesë e misionit Bandwagon-4.
Pas 74 minutash, në 09:23, sateliti u shkëput me sukses dhe u vendos në orbitën e ulët të Tokës (LEO) në lartësinë 510 kilometra. Kompania Fergani konfirmoi menjëherë pranimin e të dhënave të para telemetrike, duke vërtetuar se pajisja është funksionale.
Teknologji 100% vendase
FGN-100-D2 përfshin avionikë, softuer, strukturë mekanike dhe sistem shtytës me karburant ekologjik – të gjitha të zhvilluara nga inxhinierët turq të Fergani Space Technologies, kompani që u themelua në vitin 2022 nga Selçuk Bayraktar, drejtuesi i njohur i Baykar Technology.
Ky satelit pason prototipin FGN-100-D1, i lançuar në janar 2025, dhe do të testojë telemetrinë, telekomandën, navigimin dhe komunikimin me ngarkesën funksionale gjatë një misioni që pritet të zgjasë 5 deri në 7 vjet.
Duke lëvizur me një shpejtësi 7,6 km/s, sateliti kryen rreth 15 orbita rreth Tokës çdo ditë.
Projekti “Uluğ Bey”: sistemi i ardhshëm navigues turk
Selçuk Bayraktar e përshkroi FGN-100-D2 si një “satelit testues prej 100 kilogramësh” për programin e ardhshëm Uluğ Bey, që synon t’i ofrojë Turqisë aftësi të pavarura pozicionimi dhe navigimi, duke reduktuar varësinë nga sistemet GPS të huaja.
Fergani aktualisht punëson 135 inxhinierë dhe planifikon të zgjerojë flotën në mbi 100 satelitë brenda pesë viteve të ardhshme, përfshirë një mjet transportues orbital dhe një platformë lëshimi kombëtare që ndodhet në zhvillim.
Ky hap e pozicionon Turqinë mes pak vendeve në botë që po ndërtojnë një ekosistem të plotë hapësinor privat dhe të pavarur.
