Presidenti amerikan Donald Trump ka bërë thirrje që të gjithë kontrollorët e fluturimeve të kthehen menjëherë në punë pas një marrëveshjeje të përkohshme në Senat që do të zhbllokojë financimin e qeverisë.
Më shumë se 1.400 fluturime drejt, nga ose brenda SHBA-së u anuluan të shtunën, pasi kompanitë ajrore u udhëzuan këtë javë të zvogëlojnë trafikun për shkak të mbylljes së qeverisë pas mosmiratimit të buxhetit.
Trump falënderoi ata që punuan gjatë gjithë periudhës, por njëkohësisht kritikoi ashpër ata që morën pushim mjekësor gjatë mbylljes së institucioneve.
“Të gjithë kontrollorët e fluturimeve duhet të kthehen në punë, MENJËHERË!!!
Të gjithë ata që nuk e bëjnë këtë do të ndëshkohen rëndë.
Për ata që ishin patriotë të vërtetë dhe nuk morën pushim gjatë kësaj ‘mbylljeje mashtruese demokratike’, do të rekomandoj një bonus prej 10.000 dollarësh për person për shërbim të jashtëzakonshëm ndaj vendit tonë.
Ata që nuk bënë asgjë tjetër veçse u ankuan dhe morën pushim, ndonëse e dinin se së shpejti do të paguheshin plotësisht, më kanë zhgënjyer.
Nuk kontribuat për të ndihmuar SHBA-në kundër sulmit të rremë të demokratëve që synonte të dëmtonte vendin tonë. Do të keni një vlerësim negativ në dosjen tuaj, të paktën sipas mendimit tim.”
Më tej, Trump shtoi:
“Nëse dëshironi të largoheni nga shërbimi në të ardhmen e afërt, mos hezitoni — bëjeni menjëherë, pa pagesë dhe pa asnjë shpërblim.
Do të zëvendësoheni shpejt nga patriotë të vërtetë, të cilët do ta kryejnë punën më mirë me pajisjet më moderne në botë që jemi duke porositur.
Administrata e mëparshme harxhoi miliarda dollarë për të rregulluar një sistem të vjetruar ‘të pavlerë’. Nuk kishin asnjë ide çfarë po bënin!
Edhe një herë, Zoti i bekoftë patriotët tanë të mëdhenj amerikanë — do të mundohem t’ju dërgoj paratë sa më shpejt të jetë e mundur!
Për të tjerët – menjëherë në punë. Zoti e bekoftë Amerikën.”
Ndërkohë, demokratët shprehën zemërim ndaj lëshimeve të bëra para republikanëve, duke kërkuar që udhëheqësi i Senatit të dalë në pension.
Të dielën në mbrëmje, tetë senatorë demokratë votuan bashkë me republikanët për të ecur përpara me paketën që do të rihapë qeverinë federale. Ky votim procedural tregon se është arritur një marrëveshje dypartiake për financimin e agjencive shtetërore, votimin e subvencioneve për kujdesin shëndetësor dhe përfundimin e mbylljes më të gjatë të qeverisë në historinë e SHBA-së.
Demokratët kishin rezistuar për javë të tëra, duke kërkuar që republikanët të bashkëpunojnë në zgjatjen e kredive tatimore të Ligjit për Kujdes të Përballueshëm (ACA), të cilat janë drejt skadimit, në këmbim të financimit të qeverisë.
