Presidenti amerikan Donald Trump ka kërcënuar Iranin me bombardime dhe tarifa dytësore nëse Teherani nuk arrin një marrëveshje me Uashingtonin për programin bërthamor.
Në një intervistë telefonike për NBC News, Trump tha se zyrtarët amerikanë dhe iranianë kanë zhvilluar bisedime, por nuk zbuloi detaje të bisedave.
“Nëse nuk arrijnë një marrëveshje, do të ketë bombardime. Por ekziston edhe mundësia që t’u vendos tarifa dytësore, ashtu si katër vite më parë,” tha Trump.
Gjatë mandatit të tij të parë, Trump tërhoqi SHBA-në nga marrëveshja e vitit 2015 mes Iranit dhe fuqive botërore, e cila vendoste kufizime të rrepta për aktivitetet bërthamore të diskutueshme të Teheranit në këmbim të lehtësimit të sanksioneve.
Trump gjithashtu riktheu sanksione të ashpra amerikane. Që atëherë, Irani i ka tejkaluar ndjeshëm kufijtë e dakorduar në programin e tij për pasurimin e uraniumit. Teherani deri më tani ka refuzuar paralajmërimin e Trump-it për të arritur një marrëveshje ose për t’u përballur me pasoja ushtarake.
Irani i ka dërguar një përgjigje përmes Omanit letrës së Trump-it, në të cilën ai ftonte Teheranin për të arritur një marrëveshje të re bërthamore, tha të enjten ministri i jashtëm iranian Abbas Araqchi, sipas agjencisë zyrtare të lajmeve IRNA.
Fuqitë perëndimore e akuzojnë Iranin se ka një agjendë të fshehtë për të zhvilluar kapacitete për armë bërthamore përmes pasurimit të uraniumit në nivele të larta pastërtie fizionike, përtej asaj që konsiderohet e justifikuar për një program civil të energjisë atomike.
Teherani thotë se programi i tij bërthamor është tërësisht për nevoja civile të energjisë, raporton Reuters.
