Në Shtetet e Bashkuara të Amerikës sot po mbahen zgjedhje në disa nivele, ndërsa vëmendja kryesore është përqendruar në zgjedhjet për kryetar bashkie në New York dhe zgjedhjet për guvernatorë në New Jersey dhe Virginiа.
Zgjedhjet në New York: Mamdani favorit për kryebashkiak
Në qytetin e New Yorkut, votuesit do të zgjedhin kryetarin e ri të bashkisë, pasi Eric Adams ka vendosur të mos kandidojë për një mandat të dytë.
Favoriti kryesor është Zohran Mamdani nga Partia Demokratike, ndërsa rivalët e tij janë Andrew Cuomo, ish-guvernatori i Nju Jorkut që po kandidon në mënyrë të pavarur, dhe Curtis Sliwa, kandidati republikan.
Beteja në New Jersey: bastioni demokrat nën presion
Në New Jersey, demokratët po përballen me një sfidë të fortë dhe frikësohen se mund të humbasin një nga bastionet e tyre historike. Në 30 vitet e fundit, vetëm një guvernator republikan ka drejtuar këtë shtet, ndërsa në zgjedhjet presidenciale të vitit 2024 Kamala Harris mundi Donald Trumpin me diferencë të theksuar.
Guvernatori aktual Phil Murphy nuk mund të kandidojë përsëri, dhe gara po zhvillohet mes Mikie Sherrill (Demokrate) dhe Jack Ciattarelli (Republikan).
Sipas sondazheve, Sherrill ruan epërsi të vogël, por diferenca është mjaft e ngushtë, çka paralajmëron një garë deri në votën e fundit.
Virginia: sfidë mes Earle-Sears dhe Spanberger
Në Virginiа, gara për guvernator zhvillohet midis Winsome Earle-Sears (Republikanët) dhe Abigail Spanberger (Demokratët), pasi guvernatori aktual Glenn Youngkin nuk kishte të drejtë për një mandat të dytë.
Edhe pse Harris e fitoi këtë shtet në zgjedhjet presidenciale, Virginia mbetet një territor i paqëndrueshëm politikisht. Spanberger kryeson në shumicën e sondazheve, por analistët kujtojnë se fitorja e Youngkinit disa vite më parë tregoi se sondazhet shpesh janë mashtruese.
Testi i parë për axhendën e Trumpit
Sipas analistëve amerikanë, këto zgjedhje përbëjnë testin e parë elektoral për politikat e Donald Trumpit pas rikthimit të tij aktiv në skenën politike.
Kandidatët republikanë Jack Ciattarelli dhe Winsome Earle-Sears kanë marrë mbështetjen e plotë të Trumpit dhe janë pjesë e rrymës së tij “MAGA – Make America Great Again”, e cila përfaqëson krahun populist të Partisë Republikane.
Megjithatë, si New Jersey ashtu edhe Virginia janë shtete “blu” (me shumicë demokratike), ndaj çdo humbje republikane nuk mund t’i faturohet plotësisht Trumpit. Sidoqoftë, suksesi ose dështimi i kandidatëve të tij do të shërbejë si matës i ndikimit të politikës së tij në terren.
Zgjedhje të tjera lokale në gjithë vendin
Përveç këtyre garave kryesore, në të gjithë SHBA-në po mbahen zgjedhje për dhjetëra kryetarë bashkish, si dhe një votim special për një vend në Dhomën e Përfaqësuesve në Teksas, ku Demokratët pritet të sigurojnë një fitore të lehtë.
