Në vitin 1800, Al-Halabi vrau gjeneralin Jean Baptiste Kleber, duke hapur rrugën për tërheqjen e Francës nga Egjipti
Alaattin Doğru/Esra Taşın
Suleiman al-Halabi, dijetar i ri me origjinë kurde, i cili vrau gjeneralin Jean Baptiste Kleber, komandantin e sundimit kolonial pushtues francez të periudhës së Napoleon Bonapartës në Egjipt dhe hapi rrugën për tërheqjen e Francës nga Egjipti, po përkujtohet në 221-vjetorin e vdekjes, shkruan Anadolu Agency (AA).
Al-Halabi, i cili në burimet franceze thuhet të jetë anëtar i familjes kurde Evs Qubar, lindi në 1777 në fshatin Kukan pranë Afrinit të Sirisë.
Al-Halabi u dërgua në Mekë dhe Medinë dhe më pas në Egjipt në vitin 1797 nga babai i tij, Mohammed Emin, një tregtar gjalpi dhe vaji ulliri, për të mësuar shkencat islame.
Al-Halabi, i cili u regjistrua në Al-Azhar të Kajros, filloi të merret edhe me kaligrafi krahas studimeve të tij shkencore.
Duke u kthyer në fshatin e tij në Siri në fillim të vitit 1800 pasi përfundoi arsimin e tij në medrese, pas një kohe al-Halabi shkoi në Palestinë për të vizituar Mesxhid al-Aksanë.
Detyra e dhënë nga oficerët osmanë për vrasjen e gjeneralit kolonial
Al-Halabi-t, të cilin fati e takoi me dy oficerë të inteligjencës osmane në Kuds, iu dha detyra për të vrarë gjeneralin Jean Baptiste Kleber, komandantin e forcave koloniale pushtuese në Egjipt.
Në atë kohë 23-vjeçar, ai pranoi detyrën dhe u kthye në Kajro 20 ditë më vonë së bashku me një karvan tregtar, si dhe planifikoi vrasjen duke qëndruar në oborrin e Xhamisë së Madhe të qytetit.
