Shtetet e Bashkuara kanë dorëzuar para anëtarëve të Këshillit të Sigurimit të Kombeve të Bashkuara një draft-rezolutë që parashikon krijimin e forcave ndërkombëtare të sigurisë (ISF) në Rripin e Gazës, me mandat që do të zgjaste të paktën dy vjet, raportoi të hënën portali amerikan Axios.
Sipas kopjes së dokumentit të siguruar nga Axios, drafti – i klasifikuar si “i ndjeshëm, por jo sekret” – parasheh që SHBA-të dhe shtetet pjesëmarrëse të marrin një mandat të gjerë për administrimin e përkohshëm të Gazës.
Një zyrtar amerikan tha për Axios se rezoluta do të shërbejë si bazë për negociatat ndërmjet anëtarëve të Këshillit, me synim që ajo të miratohet në javët e ardhshme dhe që njësitë e para të vendosen në Gazë deri në janar.
Zyrtari sqaroi se misioni i ISF nuk do të jetë “paqeruajtës”, por zbatus, që do të përfshinte trupa ushtarake nga disa shtete, të formuara në bashkëpunim me një strukturë të re të quajtur “Komiteti për Paqe në Gazë”.
Sipas draftit, detyrat e forcave ISF do të përfshijnë sigurimin e kufijve të Gazës me Izraelin dhe Egjiptin, mbrojtjen e civilëve dhe korridoreve humanitare, si dhe trajnimin e një policie të re palestineze, me të cilën do të bashkëvepronin në terren.
Rezoluta parashikon gjithashtu që Komiteti për Paqe në Gazë të mbetet aktiv të paktën deri në fund të vitit 2027.
Në dokument theksohet se ISF do të kenë mision të “stabilizojnë situatën e sigurisë në Gaza përmes procesit të demilitarizimit të plotë të territorit, duke përfshirë shkatërrimin e infrastrukturës ushtarake dhe terroriste dhe ndalimin e rindërtimit të saj, si dhe çarmatosjen e grupeve të armatosura jovalstare.
Drafti parashikon gjithashtu që forcat ISF të mund të marrin “detyrime shtesë sipas nevojës” për të mbështetur zbatimin e marrëveshjeve politike për Gazën.
Më herët të hënën, ministri i jashtëm turk Hakan Fidan deklaroi se vendet do të marrin vendim mbi dërgimin e trupave në varësi të përmbajtjes së rezolutës së ardhshme të Këshillit të Sigurimit të OKB-së.
“Vendet me të cilat kemi biseduar na kanë thënë se do të vendosin nëse do të dërgojnë trupa vetëm pasi të kenë parë tekstin e plotë të rezolutës,” tha Fidan në konferencën për shtyp në Stamboll, pas një takimi për Gazën ku morën pjesë ministrat e jashtëm të Indonezisë, Pakistanit, Arabisë Saudite dhe Jordanisë, si dhe përfaqësues të Emirateve të Bashkuara Arabe dhe Katarit.
Ai shtoi se bisedimet diplomatike janë ende në zhvillim, duke theksuar se vendet pjesëmarrëse kërkojnë një mandat të qartë dhe legjitimitet ndërkombëtar për çdo forcë që do të dërgohet në Gaza.
Fidan nënvizoi se përpara miratimit të çdo rezolute duhet arritur konsensus i gjerë ndërkombëtar dhe se Këshilli i Sigurimit duhet ta miratojë atë pa veto nga anëtarët e përhershëm, ndërsa Turqia dhe vendet partnere do të vazhdojnë përpjekjet diplomatike në të gjitha fazat e këtij procesi.
