Shërbimi Federal i Inteligjencës së Gjermanisë (BND) dhe forcat e armatosura të vendit vlerësojnë se Rusia e sheh Perëndimin si armik sistemik, po forcon fuqinë e saj ushtarake dhe po përgatitet për një konflikt të madh me NATO-n, raporton Bild.
Sipas raportimeve, perandoria e Putinit është e gatshme të përdorë forcën ushtarake për të realizuar synimet e saj imperialiste. Vlerësimet, të cilat i transmetojnë edhe Süddeutsche Zeitung, WDR dhe NDR, sugjerojnë se Putini nuk do të mjaftohet vetëm me Ukrainën. Deri në fund të dekadës, Rusia pritet të krijojë të gjitha kushtet e nevojshme për zhvillimin e një “lufte të zakonshme në shkallë të gjerë”.
Shërbimi i Inteligjencës i Lituanisë (VSD) vlerëson se Rusia ende nuk është në gjendje të zhvillojë një luftë të zakonshme në shkallë të gjerë kundër NATO-s në afat të mesëm. Megjithatë, nuk përjashtohet veprimtaria ushtarake e kufizuar kundër një ose më shumë vendeve anëtare të NATO-s.
Thuhet se Putini planifikon të testojë sa seriozisht i marrin vendet e NATO-s detyrimet e nenit 5 të traktatit të NATO-s në rast emergjence.
Raporti i BND-së tregon se tre të katërtat e trupave dhe pajisjeve ushtarake ruse nga rajonet kufitare baltike aktualisht ndodhen në Ukrainë, ndërsa forcat ajrore dhe marina janë në gatishmëri të plotë. Nëse përfundon lufta në Ukrainë, njësitë ruse do të rikthehen në rajon.
Pavarësisht humbjeve të mëdha dhe sanksioneve perëndimore, Putini vazhdon të armatoset. Bundeswehri dhe BND-ja raportojnë se ekonomia ushtarake ruse prodhon më shumë se sa kërkohet për luftën në Ukrainë.
Deri në vitin 2026, forcat e armatosura ruse pritet të rriten në 1.5 milionë ushtarë. Sipas planeve të vitit 2022, numri i personelit, armatimit dhe pajisjeve ushtarake të Federatës Ruse në kufi me NATO-n pritet të rritet me 30-50 për qind.
Vërehet se Kremlini po e rrit shpenzimin ushtarak me një ritëm marramendës. Deri në vitin 2025, këto shpenzime do të arrijnë rreth 120 miliardë euro, që përbën mbi 6 për qind të PBB-së. Kështu, Rusia e ka katërfishuar buxhetin e saj ushtarak krahasuar me vitin 2021.
