Antonio Guterres kërkon ndalimin e armiqësive, ndërprerjen e fluksit të armëve nga jashtë, hapa të shpejtë drejt zgjidhjes së negociuar në vend
Sekretari i përgjithshëm i OKB-së shprehu “shqetësim të thellë” për raportet e mizorive masive dhe shkeljeve të rënda të të drejtave të njeriut në El-Fasher të Sudanit, duke shtuar se dhuna po përkeqësohet edhe në rajonin e Kordofanit, transmeton Anadolu.
Në një postim në platformën sociale të kompanisë amerikane X, Antonio Guterres bëri thirrje për ndërprerjen e menjëhershme të armiqësive, ndërsa luftimet intensifikohen midis Forcave të Armatosura Sudaneze dhe paraushtarakëve të Forcave të Mbështetjes së Shpejtë (RSF).
“Rrjedha e armëve dhe luftëtarëve nga palët e jashtme duhet të ndërpritet”, tha ai, duke theksuar se ndihma humanitare duhet të lejohet “të arrijë shpejt tek civilët në nevojë”.
Shefi i OKB-së u bëri thirrje të dyja palëve të ndërmarrin “hapa të shpejtë dhe të prekshëm” drejt një zgjidhjeje të negociuar për të parandaluar përkeqësimin e mëtejshëm të situatës.
– Përshkallëzimi i konfliktit në Sudan
Më 26 tetor, RSF mori kontrollin e El-Fasher, kryeqytetit të Shtetit të Darfurit të Veriut, dhe kreu masakra, sipas organizatave lokale dhe ndërkombëtare, mes paralajmërimeve se sulmi mund të thellonte ndarjen gjeografike të vendit.
Pas pushtimit të El-Fasher nga RSF-ja, përleshjet midis grupit rebel dhe ushtrisë sudaneze u përhapën në fronte të reja, veçanërisht në shtetet qendrore dhe jugore të Kordofanit.
Nga 18 shtetet e Sudanit, RSF-ja tani i mban të pesë në rajonin e Darfurit, përveç disa zonave veriore të Darfurit të Veriut që janë ende nën kontrollin e ushtrisë. Ushtria sudaneze vazhdon të dominojë shumicën e 13 shteteve të mbetura në rajonet jugore, veriore, lindore dhe qendrore, përfshirë kryeqytetin, Khartum.
Konflikti i përgjakshëm midis ushtrisë dhe RSF-së, i cili filloi në prill 2023, ka vrarë mijëra njerëz dhe ka zhvendosur miliona të tjerë.
