Favoritja kryesore e Kampionatit Botëror, kombëtarja e Spanjës, nuk e nisi mirë turneun dhe lejoi një nga befasitë më të mëdha duke barazuar pa gola (0:0) me Ishujt e Kepit të Gjelbër.
Spanja kishte mbërritur në Botëror si favoritja numër një sipas pothuajse të gjitha kompanive të basteve në botë. Megjithëse ka edhe kombëtare të tjera me ambicie të mëdha, spanjollët konsideroheshin pretendentët kryesorë për titullin, por këtë nuk e dëshmuan në ndeshjen e sotme.
Përfaqësuesja afrikane, e cila po debuton në Kampionatin Botëror, arriti të neutralizojë sulmet spanjolle dhe në fund të sigurojë një rezultat sensacional.
Që nga fillimi e deri në fund të ndeshjes, topi ishte kryesisht në zotërim të spanjollëve, por rastet e pastra munguan në minutat e para.
Me afrimin e fundit të pjesës së parë, Spanja shtoi presionin ofensiv, por hasi në një hero të papritur – portierin 40-vjeçar Vozinha, i cili po debuton në Botëror me Ishujt e Kepit të Gjelbër.
Në pjesën e parë ai ndali dy raste të pastra të Ferran Torresit në minutat 39 dhe 45. Po ashtu, sulmuesi spanjoll goditi edhe traversën në fund të pjesës së parë, e cila u mbyll pa gola.
Në pjesën e dytë, përzgjedhësi i Spanjës, Luis de la Fuente, aktivizoi edhe talentin e Barcelonës, Lamine Yamal. Yamal kishte pasur probleme me një lëndim dhe për këtë arsye ishte shmangur rrezikimi i tij i hershëm, por ai u hodh në fushë për të ndryshuar rrjedhën e lojës.
Mikel Oyarzabal pati dy mundësi të mëdha për të shënuar. Fillimisht tentoi nga rreth 30 metra në fillim të pjesës së dytë, ndërsa më pas Vozinha i ndali një tjetër goditje të rrezikshme në fund të takimit.
Portieri i Kepit të Gjelbër priti edhe një tentativë të mirë të Mikel Merino në minutën e 73-të, si dhe një goditje me kokë të Marc Cucurella në minutën e 83-të.
Kur Spanja humbi një sërë rastesh, Ishujt e Kepit të Gjelbër mund të kishin shokuar botën në minutën e 91-të, por goditja e Diney Borges përfundoi në duart e portierit spanjoll.
Ndeshja përfundoi 0:0, duke prodhuar surprizën më të madhe të deritanishme të Kampionatit Botëror. Spanja nuk e nisi mirë garën në të cilën synon vetëm titullin, ndërsa debutuesit nga Ishujt e Kepit të Gjelbër realizuan një arritje heroike.
Në këtë grup bëjnë pjesë edhe Arabia Saudite dhe Uruguai, të cilët do të përballen gjatë natës.
Heroi absolut i ndeshjes ishte Vozinha, i cili realizoi shtatë pritje dhe të gjitha ishin ndaj rasteve të mëdha të spanjollëve. Pa dyshim, portieri 40-vjeçar do të jetë një nga figurat më të përfolura të ditës në Botëror.
Rezultati:
Spanja – Ishujt e Kepit të Gjelbër 0:0
