Ministri i Jashtëm italian, Antonio Tajani, ka bërë thirrje që Spanja të pezullohet nga Zona Schengen, pasi qindra emigrantë hynë nga Maroku në enklavën spanjolle Ceuta.
Zona Schengen është një sistem i kufijve të hapur që përfshin 29 vende evropiane, të cilat kanë hequr zyrtarisht kontrollet kufitare në kufijtë e tyre të përbashkët.
“Jam për mbylljen e Zonës Schengen ndaj Spanjës. Emigracioni i parregullt dhe i pakontrolluar përbën rrezik për sigurinë kombëtare”, thuhet në deklaratë.
Ai tha se pamjet nga enklava tregojnë se vendimi për t’u dhënë shtetësi spanjolle dhe, rrjedhimisht, evropiane më shumë se 500 mijë emigrantëve të parregullt është thellësisht i gabuar dhe nxit trafikimin e qenieve njerëzore.
Matteo Salvini, gjithashtu zëvendëskryeministër i Italisë dhe lider i partisë së djathtë Liga, bëri thirrje po ashtu për pezullimin e Schengenit dhe mbrojtjen e kufijve evropianë.
Qeveria spanjolle njoftoi se do të dislokojë njësi ushtarake për të përforcuar forcat policore në enklavën e Ceutës në Afrikën e Veriut, pasi emigrantët më herët gjatë ditës depërtuan përmes barrierave mbrojtëse dhe hynë në qytet nga Maroku, duke tejkaluar forcat e Gardës Civile (Guardia Civil).
Pamjet filmike tregojnë qindra emigrantë duke notuar nga ana marokene, duke përdorur goma të fryra dhe mjete të tjera për të qëndruar mbi ujë, ndërsa të tjerë thyejnë portën e gardhit dhe vrapojnë drejt qytetit.
Televizioni shtetëror spanjoll TVE raportoi se kufirin e kanë kaluar ndërmjet 2.000 dhe 3.000 persona.
