Të Gjelbrit Skocezë i bënë thirrje të enjten qeverisë britanike të tërheqë ndalimin ndaj grupit Palestine Action, pasi Sekretari i Jashtëm Ed Miliband tha se “i dëgjojmë” miliona njerëzit që janë prekur dhe zemëruar nga gjendja e popullit palestinez, transmeton Anadolu.
“Njerëzit që kanë marshuar, organizuar dhe ngritur zërin kundër gjenocidit të Izraelit kanë ndihmuar që Palestina të vendoset në agjendën politike. Ata meritojnë të dëgjohen dhe të respektohen të drejtat e tyre”, citoi të ketë thënë Maggie Chapman, zëdhënëse e të Gjelbërve Skocezë, nga e përditshmja skoceze The National.
Komentet e saj erdhën pasi Miliband tha në fillim të kësaj jave se ata i dëgjojnë miliona njerëzit në këtë vend dhe më gjerë, të cilët janë prekur dhe zemëruar nga gjendja e popullit palestinez.
“Ju kishit të drejtë. Dhe nën udhëheqjen e Andyt (Burnham), ne kemi rishikuar qasjen tonë”, theksoi ai.
Chapman tha se Miliband ka të drejtë të pranojë zemërimin e ndier nga miliona njerëz që kanë parë shkatërrimin në Gaza dhe kanë kërkuar që qeveria e tyre të veprojë.
Megjithatë, ajo theksoi se qeveria britanike duhet të tërheqë ndalimin ndaj grupit Palestine Action nëse është “serioze” për ndryshimin e qëndrimit të saj politik ndaj Palestinës.
“Ky pranim do të tingëllojë bosh për sa kohë që Laburistët mbajnë në fuqi një ndalim që ka kriminalizuar qindra njerëz për denoncimin e gjenocidit dhe krimeve të tjera të luftës, valëvitjen e pankartave dhe veshjen e bluzave”, deklaroi Chapman.
“Nëse qeveria laburiste është sado pak serioze për ndryshimin e kursit, ajo duhet t’i japë fund shpalljes së Palestine Action si organizatë të ndaluar dhe të mbrojë të drejtat tona themelore për lirinë e shprehjes dhe protestës paqësore”, shtoi ajo.
Chapman i bëri thirrje qeverisë britanike të ndalojë të gjitha shitjet e armëve ndaj Izraelit dhe të sigurojë që Mbretëria e Bashkuar “të mos jetë më bashkëfajtore në shtypjen e popullit palestinez”.
Vendimi për ndalimin e Palestine Action ka çuar në mijëra arrestime të personave të akuzuar se mbështesin grupin protestues.
Palestine Action u ndalua më 5 korrik 2025 në bazë të Ligjit për Terrorizmin, pasi anëtarë të grupit hynë në një bazë të Forcave Ajrore Mbretërore dhe lyen me bojë dy avionë, duke shkaktuar dëme me vlerë 7 milionë paundë, sipas policisë.
Gjykata e Lartë vendosi në shkurt se ndalimi ishte joproporcional dhe i paligjshëm, por vendimi i saj u rrëzua muajin e kaluar nga Gjykata e Apelit.
Megjithatë, në korrik, gjykata më e lartë e Mbretërisë së Bashkuar i dha leje bashkëthemelueses së Palestine Action, Huda Ammori, të kundërshtojë vendimin e Gjykatës së Apelit që la në fuqi ndalimin e grupit.
Organizatat për të drejtat e njeriut, së bashku me ekspertë të OKB-së, kanë kritikuar goditjen në rritje ndaj protestave paqësore në Mbretërinë e Bashkuar, duke i bërë thirrje qeverisë të heqë përcaktimin e Palestine Action si grup terrorist.
