Punëtorët e Radio Televizionit të Kosovës (RTK), të cilët nuk bëjnë pjesë në asnjë prej sindikatave, kanë paralajmëruar protestë për çështjen e pagave.
Këtë protestë e ka mbështetur edhe SPERTK.
Sipas njoftimit, protesta fillon të hënën në orën 09:30.
SPERTK u ka bërë thirrje të gjithë punëtorëve të dalin dhe të mbështesin çdo protestë për të drejtat e punëtorëve dhe mbrojtjen e mediumit publik.
“Kjo protestë i paraprin protestave të tjera, dhe aktivitetet sindikale nuk do të ndalen deri në arritjen e këtij qëllimi. Deri në realizimin e plotë të qëllimeve tona, do të organizojmë aktivitete sindikale”, tha SPERTK.
Kjo sindikatë tha se nëse pagat dalin në llogari para ditës së protestës, atëherë protesta do të anulohet.
