Një nga nismëtaret e kërkesës për nisjen e peticionit në Mitrovicë të Veriut, Sanja Kërtiniq, ka thënë se duhen 3 mijë e 640 nënshkrime për të zëvendësuar kryetarin dhe përkundër se peticioni është vonuar, besohet që ato do të mblidhen brenda një dite.
Kërtiniq ka thënë për Kossev se peticioni është vonuar për shkak të pengesave të shumta në komunë.
“Na kanë kthyer në disa raste. Ka pasur arsye nga më të ndryshmet, nuk e ke plotësuar saktë formularin, po të mungon një fletë tjetër, nuk jemi adresa për të, etj. Nga fillimi e deri në fund Udhëzimi Administrativ u interpretua si të donin, gjithmonë kishte boshllëqe dhe sa të ishte e mundur si të vonohej. Nëse udhëzimet thonë një gjë, atëherë duhet bërë në atë mënyrë. Nuk mund të interpretohet në mënyrën e vet”, ka thënë ajo.
Ajo shprehet optimiste se do të arrijnë të mbledhin numrin e duhur të nënshkrimeve, pavarësisht afatit tashmë të shkurtër“Shikoni vetë sa njerëz ka sot. Besoj se edhe brenda një dite do të arrijmë t’i mbledhim 3640 nënshkrimet që na duhen”, ka thënë Kërtiniq.
Javën e ardhshme, mbledhja e nënshkrimeve prite të nisë edhe në Zveçan dhe Zubin Potok.
Kryetarët në katër komunat në veri të Kosovës, që banohen me shumicë serbe – Mitrovicë e Veriut, Leposaviq, Zveçan dhe Zubin Potok – janë shqiptarë, pasi partitë dhe popullata serbe bojkotoi zgjedhjet lokale të vitit të kaluar.
Nënshkrimet për largimin e tyre tani po mblidhen në bazë të Udhëzimit Administrativ të Qeverisë së Kosovës, i cili është miratuar në fillim të shtatorit 2023.
Në mënyrë që peticioni të jetë i suksesshëm, kërkohet që të mblidhen të paktën 20 për qind e nënshkrimeve nga numri i përgjithshëm i votuesve të regjistruar.
Sipas Komisionit Qendror të Zgjedhjeve (KQZ), në Mitrovicën e Veriut duhet të mblidhen së paku 3.640 nënshkrime për shkarkimin e kryetarit të komunës, pasi në listën zgjedhore janë regjistruar 18.199 persona me të drejtë vote.
Në komunën e Leposaviqit të drejtë vote kanë 13.441 persona, që do të thotë se të paktën 2.689 prej tyre duhet ta nënshkruajnë peticionin për shkarkimin e kryetarit.
Në Zubin Potok peticionit duhet t’i përgjigjen së paku 1.347 votues, që është 20 për qind nga 6.732 të votuesve të regjistruar.
E në Zveçan, që peticioni të jetë i suksesshëm duhet të nënshkruhet nga së paku 1.411 persona.
