Kjo pemë ulliri, që mendohet të jetë rreth 4000-vjeçare, simbolizon fuqinë dhe qëndrueshmërinë e natyrës. Për shekuj me radhë, ajo ka qenë dëshmitare e perandorive, luftërave dhe fatkeqësive natyrore, por pavarësisht të gjitha këtyre sfidave, ajo vazhdon ende të japë fryte. Në peizazhin mesdhetar, të formuar nga dielli dhe era, ngrihet një pemë që ka parë mijëra vjet histori.
Në fshatin Ano Vouves, në perëndim të ishullit të Kretës, ndodhet “Olivo de Vouves”, që vlerësohet të jetë rreth 4000 vjeç dhe prodhon çdo vit afërsisht 150 kilogramë ullinj.
Kjo pemë e jashtëzakonshme i përket llojit Olea europaea L. dhe ka qenë dëshmitare e civilizimeve minoike, mikeane dhe romake.
Ndryshe nga pemët e tjera monumentale, “Olivo de Vouves” është ende biologjikisht aktive me trungun e saj të gjallë dhe kurorën e gjelbër.
Çdo vit ajo lëshon fidane të reja, duke ruajtur gjallërinë pavarësisht kalimit të kohës.
TURISTËT VËRSHOJNË
Kjo pemë, e shpallur Monument Natyror në vitin 1997 nga Qeveria Greke, përveçse bashkon historinë me natyrën, është bërë një destinacion i rëndësishëm për adhuruesit e kuzhinës tipike mesdhetare.
Sot, ajo është ndër pikat turistike më të vizituara të Kretës, duke pritur mijëra turistë çdo vit.
Në fshatin e vendosur mes kodrave dhe shtigjeve rurale, në vitin 2009 u hap Muzeu i Pemës së Ullirit të Vouves, që prezanton historinë dhe kulturën e rajonit.
Muzeu është i pajisur me presa të vjetra, mjete tradicionale dhe fotografi që tregojnë lidhjen shekullore të popullit kretan me prodhimin e vajit të ullirit dhe me pemën mijëravjeçare të ullirit. Vizitorët mund të përjetojnë këtu një eksperiencë unike që bashkon natyrën dhe kulturën e ullishtarisë.
Ano Vouves është një destinacion ideal për një udhëtim gjysmëditor: mund të ecni përgjatë rrugëve rurale, të shijoni recetat tradicionale të kuzhinës kretane në bizneset familjare dhe të kënaqeni me pamjet panoramike të ullishtave që zbukurojnë ishullin.
VEÇORITË E PEMËS
-
Mosha e vlerësuar: 4000 vjet
-
Diametri: 4.6 metra
-
Lartësia: 12.5 metra
-
Vizita vjetore: rreth 20,000 turistë
-
Hyrja në muze: 3 euro
-
Statusi i mbrojtjes: Shpallur Monument Natyror në vitin 1997
-
Vendndodhja: Fshati Ano Vouves, Kreta, 30 km nga Hania
