Trupat gjermane do të marrin pjesë këtë vjeshtë, për herë të parë, në një stërvitje franceze të parandalimit bërthamor, ndërsa Berlini dhe Parisi, para samitit të përbashkët, paralajmërojnë forcimin e mëtejshëm të kapaciteteve të përbashkëta të mbrojtjes.
Ky hap vjen në prag të samitit franko-gjerman që do të mbahet të premten, ku pritet që kancelari Friedrich Merz dhe presidenti francez Emmanuel Macron të paraqesin hapa të rinj për thellimin e bashkëpunimit në fushën e parandalimit bërthamor.
Sipas burimeve diplomatike të cituara nga mediat gjermane, dy liderët pritet që pas takimit të shpjegojnë në hollësi kornizën e zgjeruar të bashkëpunimit.
Forcat Ajrore Gjermane kanë ndërmarrë tashmë masa konkrete në këtë drejtim. Një zëdhënës konfirmoi për agjencinë gjermane të lajmeve DPA se dy avionë luftarakë francezë Rafale, të aftë për të mbajtur armë bërthamore, dhe dy avionë gjermanë Eurofighter kanë zhvilluar së fundmi stërvitje të furnizimit me karburant në ajër.
Për të premten është planifikuar gjithashtu mirëmbajtja e përbashkët e avionëve nga personeli gjerman dhe francez në bazën ajrore Nörvenich, pranë Këlnit. Qëllimi i këtij aktiviteti është forcimi i ndërveprueshmërisë dhe gatishmërisë operacionale të dy ushtrive.
Po atë ditë, në këtë bazë do të mbahet edhe takimi i Këshillit Franko-Gjerman për Mbrojtje dhe Siguri, i cili do të bashkëkryesohet nga Merz dhe Macron, me pjesëmarrjen e ministrave të Punëve të Jashtme dhe të Mbrojtjes.
Në rendin e ditës pritet të jenë çështjet e politikës së jashtme dhe të sigurisë, përfshirë parandalimin bërthamor dhe forcimin e kapaciteteve ushtarake evropiane.
Më vonë gjatë së premtes, dy liderët do të udhëtojnë drejt Brühlit, ku në Pallatin Augustusburg është planifikuar një mbledhje më e gjerë e përbashkët e kabineteve qeveritare.
