Nxënësit e shkollave fillore në Turqi do të kenë një lëndë të re që do t’i mësojë si të jenë konsumatorë të përgjegjshëm dhe të vetëdijshëm. Ky ndryshim është përcaktuar në programin presidencial vjetor për vitin 2026.
Kursi është konceptuar për t’u ndihmuar fëmijëve të zhvillojnë aftësi që, në moshë të rritur, t’i bëjnë qytetarë të informuar, të përgjegjshëm dhe me ndjeshmëri shoqërore. Përveç kësaj, parashihet ndryshimi i legjislacionit për të forcuar mbrojtjen e konsumatorëve, veçanërisht të shtresave më të ndjeshme të shoqërisë.
Ndryshimet e tjera në fushën e arsimit do të përqendrohen në përmirësimin e arsimit për fëmijët me nevoja të veçanta zhvillimore. Do të zbatohen mekanizma parandalues për nxënësit që rrezikojnë të ndërpresin shkollimin dhe infrastruktura për mësimin online do të mbështetet me inteligjencë artificiale (AI) – veçanërisht e rëndësishme në rrethana të jashtëzakonshme.
Platforma dixhitale e të nxënit do të pasurohet me përmbajtje të re, në mënyrë që nxënësit të kenë më shumë burime mësimore. Po ashtu, do të organizohen gara dhe aktivitete për tema që lidhen me qëndrueshmërinë, ndryshimet klimatike, kulturën dhe sportin, raportoi gazeta Hürriyet.
