Një dozë e ulët ditore e aspirinës mund të ndihmojë në parandalimin e sulmeve në zemër dhe goditjeve në tru tek njerëzit që janë në rrezik më të lartë prej tyre.
Megjithatë, hulumtimet e reja kanë treguar se marrja e aspirinës rregullisht mund të rrisë rrezikun e zhvillimit të anemisë, veçanërisht te njerëzit mbi 65 vjeç.
Marrja e pilulës vetëm për arsye parandaluese, nëse nuk keni pasur një atak në zemër, mund të bëjë më shumë dëm sesa mirë, sipas një studimi të botuar në Annals of Internal Medicine.
“Ka prova në rritje se aspirina vetëm për parandalim mund të mos jetë aq e dobishme sa menduam dhe mund të jetë më e dëmshme sesa menduam,” tha Parag Goyal, një kardiolog me bazë në Nju Jork, i cili nuk ishte i përfshirë në kërkimin e ri.
Megjithatë, ai theksoi se gjetjet e reja vlejnë vetëm për personat që nuk kanë sëmundje të zemrës.
“Nëse dikush ka pasur një atak në zemër në të kaluarën, aspirina është me të vërtetë e rëndësishme për të vazhduar,” tha ai.
Marrja e aspirinës për arsye parandaluese është gjithnjë e më e popullarizuar në mesin e njerëzve që nuk kanë pësuar sulm në zemër ose goditje në tru. Megjithatë, gjaku më i hollë mund të nënkuptojë gjithashtu se jeni në rrezik të ulcerave dhe gjakderdhjes në traktin gastrointestinal.
