Liderja e ekstremit të djathtë francez, Marine Le Pen, ka lënë sallën e gjyqit në Paris përpara se vendimi kundër saj të lexohej plotësisht.
Gjykata e dënoi atë me katër vite burg, nga të cilat dy me kusht, dhe i ndaloi kandidimin për funksione politike për një periudhë prej pesë vitesh.
Le Pen nuk qëndroi deri në fund të shpalljes së vendimit, por vrapoi nëpër ndërtesën e gjykatës pa dhënë deklarata për mediat, më pas hipi në një makinë dhe u largua nga vendi i ngjarjes.
Me vendim gjykate, ajo u dënua gjithashtu me një gjobë prej 100.000 eurosh. Është pothuajse e sigurt që ajo do të apelojë vendimin, dhe dënimi me burg dhe gjobë nuk do të zbatohet deri sa të shterohen të gjitha mjetet juridike.
Kryetarja e trupit gjykues, Bénédicte de Perthuis, deklaroi se veprimet e Marine Le Pen përbënin “një sulm serioz dhe të qëndrueshëm ndaj rregullave të jetës demokratike në Evropë, veçanërisht në Francë.”
Le Pen dhe bashkëpunëtorët e saj, përfshirë tetë deputetë të Parlamentit Evropian nga partia e saj Tubimi Kombëtar (RN) dhe 12 asistentë, u shpallën fajtorë për keqpërdorim të fondeve të Parlamentit Evropian. Ata u akuzuan për përdorimin e parave nga buxheti i BE-së për të paguar staf që në fakt punonte për partinë e saj politike në Francë.
Prokuroria franceze më parë kishte kërkuar një dënim prej pesë vitesh burg, nga të cilat dy me kusht, një gjobë prej 300.000 eurosh dhe ndalim kandidimi për pesë vite, duke kërkuar që ndalimi të mbetej në fuqi edhe në rast të apelimit.
Vendimi i gjykatës ka shkaktuar reagime politike në mbarë Evropën. Kryeministri hungarez Viktor Orban menjëherë pas vendimit shprehu mbështetje për Le Pen, duke postuar në rrjetin X: “Je suis Marine!”
Ky vendim mund të ndikojë ndjeshëm në peizazhin politik të Francës, pasi sondazhet e mëparshme tregonin se Le Pen kishte gjasa të mëdha ta pasonte Emmanuel Macron në postin e presidentit në vitin 2027.
Nën udhëheqjen e saj, Tubimi Kombëtar është përpjekur të zbusë imazhin e tij si ekstrem i djathtë, por ky vendim e ka tronditur edhe më shumë besueshmërinë e saj politike.
