Albin Kurti, kryeministër i Kosovës, ka folur sërish rreth sulmit terrorist që u krye në Banjskë me 24 shtatorë nga disa serbë. Rreth kësaj, i pari i qeverisë ka deklaruar se sulmi nga terroristët serbë ka kërcënuar integritetin territorial të Kosovës, sovranitetin shtetëror dhe sigurinë kombëtare, shkruan Gazeta Metro.
Kryeministri Kurti, po ashtu ka theksuar nevojën për bashkëpunim më të madh ndërkombëtar, në ruajtën, mbrojtjen dhe kontrollin e kufirit me Serbinë.
Pos këtyre, Kurti ka kërkuar edhe që Serbia duhet ndëshkuar për sulmin terrorist, sepse nëse nuk ndodh një gjë e tillë, siç ka thënë Kurti, ajo, Serbia pra, do ta përsërisë krimin.
Përveç synimeve të njëjta, Vuçiqin dhe Millosheviçin i lidh i njëjti karakter i shteteve dhe shoqërive që ata krijuan dhe sundojnë. Synimi i të dyve është homogjenizimi i serbëve për projektin e hegjemonisë serbe në rajon. Millosheviqi, ashtu si Vuçiqi, nuk mund ta imagjinonte, e lëre më ta ndërtonte Serbinë pa një politikë agresive, hegjemoniste ndaj fqinjëve. Edhe atëherë dhe sot, Beogradi zyrtar beson se vetëm homogjenizimi i kombit garanton hegjemoninë territoriale të shtetit. Ne jemi e kundërta, popujt që janë shtypur dhe shfrytëzuar nga Serbia për më shumë se një shekull. Serbia ka bërë disa herë gjenocid, sepse donte vendin tonë, por pa ne.
Është e qartë se sulmi terrorist në Banjskë në Zveçan kërcënoi integritetin tonë territorial, sovranitetin shtetëror dhe sigurinë kombëtare. Gjithashtu, sulmi terrorist nxori në pah vështirësitë, si dhe nevojën për bashkëpunim më të madh ndërkombëtar në ruajtjen, mbrojtjen dhe kontrollin e kufirit me Serbinë. Pra, nevoja për ndëshkim të hapur – dhe atë me gjuhë të qartë dhe të përshtatshme – si dhe kërkesa e shprehur e bashkësisë ndërkombëtare ndaj Serbisë. Po e përsëris se provat e mbledhura gjatë hetimeve të kryera tregojnë për përfshirjen e drejtpërdrejtë të institucioneve shtetërore të Serbisë në këtë akt agresioni kundër Republikës së Kosovës. Për këtë Serbia duhet të sanksionohet dhe ndëshkohet ndërkombëtarisht. Nëse edhe ky akt mbetet i pandëshkuar, Serbia do ta përsërisë krimin.
Natyrisht, falënderojmë të gjitha vendet që e dënuan sulmin terrorist dhe kriminal në Banjskë të Zveçanit, si akt agresioni të Serbisë. I jemi mirënjohës edhe për mbështetjen që na kanë dhënë. /gazetametro.net
