Zyrtarët e zbatimit të ligjit, përfshirë kryetarin e bashkisë së Romës Roberto Gualtieri dhe ministrin e Kulturës Alessandro Giuli, ishin në vendngjarje
Një kullë mesjetare u shemb pjesërisht në qendër të Romës, kryeqyteti i Italisë, të hënën në mëngjes, ndërsa punimet e rinovimit ishin duke u zhvilluar, duke plagosur rëndë të paktën një punëtor, thanë ekipet e shpëtimit, raporton Anadolu.
Të paktën 11 persona të tjerë që punonin në “Torrei dei Conti” u shpëtuan nga zjarrfikësit, të cilët nxituan në vendngjarje me tre ekipe emergjence dhe dy kamionë me shkallë. Policia rrethoi zonën me pamje nga Via dei Fori Imperiali në qendër të Romës, pranë Koloseumit, e cila ishte e mbushur me qindra turistë.
Shembja e parë masive ndodhi rreth orës 11:30 të mëngjesit sipas orës lokale dhe u pasua nga një e dytë, rreth një orë e gjysmë më vonë, ndërsa ekipet e shpëtimit ishin në punë.
Disa prej tyre u përfshinë në shembjen e dytë, gjë që i detyroi ata të ndalonin përkohësisht operacionet duke përdorur një shkallë të lëvizshme, treguan imazhet televizive. Zjarrfikësit thanë se ekipi i shpëtimit nuk u lëndua.
Informacioni fillestar tregoi se një nga punëtorët ishte bllokuar nën rrënoja, por vazhdoi të reagonte në komunikimin me ekipet e shpëtimit, raportuan mediat lokale. Gjendja e punëtorit të bllokuar pas shembjes së dytë nuk dihet.
Zyrtarët e zbatimit të ligjit, përfshirë kryetarin e bashkisë së Romës Roberto Gualtieri dhe ministrin e Kulturës Alessandro Giuli, ishin në vendngjarje.
Torre dei Conti, e ndërtuar në vitin 1238 nga Papa Innocent III, po i nënshtrohej punimeve të rinovimit pas vitesh braktisjeje. Prokurorët e Romës kanë hapur një hetim për shembjen, thanë mediat italiane.
