Sekretari i përgjithshëm i NATO-s, Mark Rutte, bëri të ditur të mërkurën se katër ushtarë amerikanë, të cilët ishin zhdukur gjatë një stërvitjeje ushtarake në Lituani, janë të vdekur.
Rutte tha se detajet e aksidentit ende nuk janë të njohura.
Një zyrtar i ushtrisë amerikane, i cili foli në kushte anonimiteti, konfirmoi se ushtarët po merrnin pjesë në një stërvitje ushtarake, por nuk komentoi statusin e tyre.
“Këto janë ende informacionet e para, kështu që nuk i dimë detajet. Kjo është vërtet një lajm i tmerrshëm dhe mendimet tona janë me familjet e viktimave dhe të afërmit e tyre,” tha Rutte gjatë një vizite në Varshavë.
Sipas një deklarate të Komandës së Ushtrisë Amerikane për Evropë dhe Afrikë, ushtarët në momentin e incidentit po merrnin pjesë në një trajnim taktik të rregullt.
Televizioni kombëtar lituanez LRT raportoi se katër ushtarë dhe një automjet ushtarak u zhdukën të martën pasdite gjatë një stërvitjeje në poligonin ushtarak General Silvestras Žukauskas në Pabradė – një vendndodhje më pak se dhjetë kilometra larg kufirit me Bjellorusinë.
Lituania, së bashku me Letoninë dhe Estoninë, është anëtare e NATO-s, dhe marrëdhëniet me Rusinë – aleaten kryesore të Bjellorusisë – janë përkeqësuar ndjeshëm pas fillimit të luftës në Ukrainë në vitin 2022.
