“Së pari, nuk mendoj se është e mundur. Së dyti, do të isha i ofenduar. Duhet ta meritosh për të shkuar në Kupën e Botës”, ka thënë presidenti i Komitetit Olimpik Kombëtar Italian (CONI), Luciano Buonfiglio.
Italia ka hedhur poshtë sugjerimin se mund të zëvendësojë Iranin në Kupën e Botës FIFA 2026, me figura të larta që theksojnë se kualifikimi duhet të fitohet me meritë.
Sipas një lajmi në Financial Times, Paolo Zampolli, i lindur në Itali dhe i dërguar i posaçëm i Trumpit, ka propozuar që Italia, e eliminuar së fundmi në kualifikime, të zërë vendin e Iranit në turneun që do të organizohet nga SHBA-ja, Meksika dhe Kanadaja.
Siç ka raportuar La Gazzetta Dello Sport, i pari që e ka hedhur poshtë idenë ka qenë presidenti i Komitetit Olimpik Kombëtar Italian (CONI), Luciano Buonfiglio, i cili ka folur në margjinat e Çmimit të Qytetit të Romës të organizuar nga OPES.
“Së pari, nuk mendoj se është e mundur. Së dyti, do të isha i ofenduar. Duhet ta meritosh për të shkuar në Kupën e Botës”, ka thënë ai.
Ministri italian për Sport dhe Rini, Andrea Abodi, i bëri jehonë këtyre komenteve gjatë një paraqitjeje në Pallatin Quirinale, pas një ceremonie me rastin e 70-vjetorit të Gjykatës Kushtetuese.
“Rikualifikim për Italinë në Kupën e Botës? Nuk është i përshtatshëm, Duhet të kualifikohesh në fushë”, tha ai.
Edhe Irani ka reaguar, duke sinjalizuar synimin e tij për të marrë pjesë siç është planifikuar.
Zëdhënësja e qeverisë, Fatemeh Mohejerani, tha se përgatitjet tashmë janë duke u zhvilluar për turneun e vitit 2026, i cili do të organizohet në SHBA.
“Ministria e Rinisë dhe Sportit ka njoftuar, me urdhër të ministrit, përgatitjen e plotë të ekipit tonë kombëtar të futbollit për pjesëmarrje në Kupën e Botës 2026 në Shtetet e Bashkuara”, tha ajo.
“Janë marrë masat e nevojshme për të siguruar që këta të rinj të mund të marrin pjesë me krenari dhe sukses”, tha Mohejerani.
