Ish-Sekretari i NATO-s Jens Stoltenberg rrëfeu takimin e tij me Presidentin ukrainas Zelensky në vitin 2022, duke thënë se NATO nuk do të marrë rrezikun e Luftës së Tretë Botërore për Ukrainën. Sipas një raporti të The Times; Stoltenberg, gjatë pjesëmarrjes në një festival letrar, ndau kujtimet e tij.
STOLTENBERG RRËFEN PAS-SKENAT
Stoltenberg për herë të parë shpjegoi pas-skenën e vendimit kyç të vitit 2022 — mosmbylljen e hapësirës ajrore të Ukrainës nga ana e NATO-s — që ndryshoi rrjedhën e luftës midis Rusisë dhe Ukrainës.
Ai tha se në vitin 2022 Presidenti i Ukrainës Volodymyr Zelensky e kishte thirrur nga një strehë në Kiev dhe i kishte kërkuar NATO-s të mbyllë hapësirën ajrore të Ukrainës për të penguar sulmet e avionëve rusë.
Stoltenberg transmetoi fjalët e Zelenskyt: “E di që NATO mund ta bëjë këtë sepse e keni bërë më parë. NATO mbylli hapësirën ajrore mbi Bosnjë-Hercegovinën në vitet 1990 për të parandaluar mizoritë. Aleatë të NATO-s, përfshirë Britaninë e Madhe, mbyllën hapësirën ajrore mbi veriun e Irakut për të mbrojtur kurdët.”
“NUK DUAM TË HYJMË NË LUFTË ME RUSINË”
Duke thënë se e kupton pse Zelensky e kërkonte këtë, Stoltenberg vijoi:
“E kuptoj pse e kërkon. Por kjo nuk do të ndodhë, sepse nëse NATO do të mbyllte hapësirën ajrore të Ukrainës, gjëja e parë që do të duhej të bënim ishte të çaktivizonim sistemet ruse të mbrojtjes ajrore në Bjellorusi dhe në Rusi. Sepse nuk mund të fluturonim mbi hapësirën ajrore të Ukrainës me raketa ruse të mbrojtjes ajrore që synojnë avionët e NATO-s.
Dhe nëse në ajër do të ishte një avion ose helikopter rus, ne do të detyroheshim ta rrëzonim — dhe atëherë do të hynim në një luftë të plotë me Rusinë. Dhe ne nuk jemi të gatshëm ta bëjmë këtë. Siç tha edhe presidenti i atëhershëm i SHBA-s, Biden, nuk do të rrezikojmë një Luftë të Tretë Botërore për Ukrainën.”
“NJË MOMENT I DHIMBSHËM”
Stoltenberg tha se në atë kohë ishin të shqetësuar për sigurinë e Zelenskyt: “E mbaj mend shumë të dhimbshme përfundimin e telefonatës me Zelenskyn duke ditur se jeta e tij ishte në rrezik.”
Mëngjesin e 24 shkurtit, kur filloi pushtimi i plotë, të gjitha vendet u mblodhën në selinë e NATO-s dhe Stoltenberg tha se atë ditë u morën dy vendime:
-
“Së pari, të rrisnim mbështetjen tonë për Ukrainën — dhe këtë e bëmë.”
-
“Së dyti, të bënim gjithçka që mundnim për të parandaluar që kjo luftë të dilte jashtë kufijve të Ukrainës dhe të shndërrohej në një luftë të plotë midis Rusisë dhe NATO-s.”
“NUK DONIM NJË LUFTË TË PLOTË ME RUSINË”
Duke vënë në dukje tensionin midis këtyre dy objektivave, Stoltenberg tha: “Nëse qëllimi ynë i vetëm do të ishte që Ukraina të fitonte, ne mund të kishim dërguar trupa dhe fuqinë ajrore të NATO-s për të luftuar në terren. Ne nuk e bëmë këtë sepse nuk donim një luftë të plotë midis Rusisë dhe NATO-s. Prandaj kemi dërguar armë dhe municione.”
Jens Stoltenberg shërbeu si Sekretar i Përgjithshëm i NATO-s për dhjetë vjet, nga 2014 deri në 2024. Ish-kryeministër i Norvegjisë dy herë, Stoltenberg aktualisht shërben si Ministër i Financave i Norvegjisë./Gazeta e Re
