Gjykata Ushtarake e Qarkut Jugor në Rostov mbi Don ka dënuar 23 robër lufte ukrainas, të cilët shërbenin në forcat Azov të Mbrojtjes ukrainase, me dënime të rënda me burgim.
Disa nga të burgosurit ukrainas janë dënuar në mungesë me dënime të gjata me burg, ndërsa shumica e të pranishmëve në gjykatë janë dënuar me nga 13 deri në 24 vite burg.
Për ashpërsinë e dënimeve flet edhe fakti se nëntë gra që shërbenin si kuzhiniere ushtarake janë dënuar në mungesë me nga 13 deri në 14 vite burg.
Disa prej të dënuarve kanë vdekur në burgjet ruse para shpalljes së vendimit, ndërkohë që të gjithë janë marrë në pyetje pa praninë e avokatëve, dhe shumë prej tyre janë torturuar dhe u është mohuar ndihma mjekësore.
“Kam parë çanta në kokat e njerëzve, tela në gjymtyrë të ndryshme, brinjë të thyera, veshka të dëmtuara, njerëz të rrahur për vdekje, uri për më shumë se një vit, pa ndihmë mjekësore, njerëz që kalbeshin, këmbë, duar, morra, insekte. Dy herë në vit na çonin për dush, por dilnim më të ndotur se sa hynim,” tha në dëshminë e tij njëri prej robërve të kthyer nga shkëmbimi.
