Inkursionet izraelite në Quneitra janë intensifikuar kohët e fundit, me vendasit që ankohen për përparimet e Tel Avivit në tokat e tyre bujqësore
Forcat izraelite hynë në qytetin Kwdana në periferi të Quneitras në jugperëndim të Sirisë, raportuan sot mediat lokale, transmeton Anadolu.
Kanali shtetëror Al-Ikhbariyah raportoi mbi bastisjen, pa dhënë detaje të mëtejshme. Nuk pati asnjë koment të menjëhershëm nga ushtria izraelite ose autoritetet siriane mbi raportin.
Inkursionet izraelite në Quneitra janë intensifikuar kohët e fundit, me vendasit që ankohen për përparimet e Tel Avivit në tokat e tyre bujqësore si dhe për shkatërrimin e qindra hektarëve pyje, arrestimet e banorëve dhe krijimin e pikave të kontrollit ushtarak.
Ushtria izraelite ka kaluar vazhdimisht në territorin sirian, duke kryer sulme ajrore të cilat kanë vrarë civilë dhe shkatërruar pozicione ushtarake, automjete, armë dhe municione që i përkisnin ushtrisë siriane.
Sipas të dhënave qeveritare, ushtria izraelite kishte kryer mbi 1.000 sulme ajrore në Siri dhe më shumë se 400 bastisje ndërkufitare në provincat jugore që nga dhjetori i vitit 2024.
Pas rënies së regjimit të Asadit në fund të vitit 2024, Izraeli zgjeroi pushtimin e Lartësive të Golanit në Siri duke pushtuar zonën e demilitarizuar tampon, një veprim që shkeli Marrëveshjen e Shkëputjes së vitit 1974 me Sirinë.
