Kupa e Botës po zhvillohet me një format të ri të garës, ndaj shumë tifozë kanë mbetur të paqartë se si përcaktohet renditja në grupe kur dy ose më shumë kombëtare përfundojnë me numër të njëjtë pikësh.
Për këtë arsye, FIFA ka përcaktuar qartë kriteret që do të përdoren për ndarjen e ekipeve me bilanc të barabartë pas përfundimit të fazës së grupeve.
Ndryshimi më i rëndësishëm është se rezultatet në ndeshjet e drejtpërdrejta tani janë kriteri kryesor, ndërsa më parë, si në Kupën e Botës në Katar, prioritet kishte dallimi i përgjithshëm i golave. Gjithashtu, është hequr edhe hedhja e shortit si opsioni i fundit për përcaktimin e renditjes.
Ky vendim mund të ketë rëndësi të madhe edhe për kombëtaren e Bosnje dhe Hercegovinës, e cila në Grupin B ndodhet së bashku me Zvicrën, Kanadanë dhe Katarin.
Bosnja ka barazuar 1:1 me Kanadanë dhe deri në fund të fazës së grupeve e presin ndeshjet kundër Zvicrës dhe Katarit.
Kriteret për renditjen e ekipeve me pikë të barabarta
Nëse dy ose më shumë kombëtare përfundojnë me të njëjtin numër pikësh, fillimisht merren parasysh kriteret që lidhen vetëm me ndeshjet ndërmjet atyre ekipeve:
- Numri i pikëve në ndeshjet e ndërsjella;
- Dallimi i golave në ndeshjet e ndërsjella;
- Numri i golave të shënuar në ndeshjet e ndërsjella.
Nëse ekipet mbeten ende të barabarta, atëherë përdoren kriteret e mëposhtme:
- Dallimi i përgjithshëm i golave në të gjitha ndeshjet e grupit;
- Numri total i golave të shënuar në grup;
- Pikët “fair-play”, bazuar në kartonët e verdhë dhe të kuq të lojtarëve dhe stafit teknik.
FIFA renditja botërore si kriteri i fundit
Nëse edhe pas këtyre kritereve nuk mund të përcaktohet renditja përfundimtare, FIFA do të përdorë kriterin e fundit:
- Pozita në renditjen më të fundit botërore të FIFA-s.
Kjo do të thotë se kombëtarja e renditur më lart në klasifikimin botëror do të ketë përparësi ndaj asaj me renditje më të ulët.
Tetë vendet më të mira të treta kalojnë tutje
Me formatin e zgjeruar të Kupës së Botës, në fazën nokaut do të kualifikohen edhe tetë kombëtaret më të mira që përfundojnë në vendin e tretë të grupeve.
Renditja e tyre do të përcaktohet sipas këtyre kritereve:
- Numri i pikëve;
- Dallimi i golave;
- Numri i golave të shënuar;
- Fair-play;
- Renditja botërore e FIFA-s.
Kjo do të thotë se çdo gol i shënuar, çdo gol i pësuar dhe madje çdo karton mund të ketë rëndësi vendimtare në garën për kalimin në fazën tjetër.
Në formatin e ri të Kupës së Botës nuk do të mjaftojë vetëm grumbullimi i pikëve, pasi kalimi tutje mund të vendoset nga detaje të vogla si një gol diferencë apo edhe sjellja disiplinore e ekipit gjatë fazës së grupeve.
