Federata Ndërkombëtare e Futbollit, FIFA, ka njoftuar se do t’ia paguajë në tërësi honorarin e Kampionatit Botëror gjyqtarit somalez Omar Abdulkadir Artan, i cili ishte deleguar për Botërorin 2026, por nuk u lejua të hynte në Shtetet e Bashkuara të Amerikës.
FIFA zakonisht i paguan gjyqtarët pas përfundimit të turneut, ndërsa të ardhurat totale, përfshirë bonuset e bazuara në performancë, mund të arrijnë deri në 100 mijë dollarë. Megjithatë, gjyqtarëve nuk u bëhet e ditur paraprakisht shuma e saktë që do të përfitojnë.
Artan, 34 vjeç, i cili pritej të bëhej gjyqtari i parë somalez që do të drejtonte ndeshje në një Kampionat Botëror, u ndalua në aeroportin e Miamit. Sipas burimeve të mëhershme, ai u mor në pyetje për 11 orë nën dyshimet për lidhje të mundshme terroriste, para se autoritetet amerikane t’i refuzonin hyrjen në vend.
Presidenti i FIFA-s, Gianni Infantino, e kishte cilësuar më herët këtë rast si një rrethanë të pafat gjatë përgjigjeve ndaj pyetjeve të gazetarëve.
Artan, i cili në vitin 2025 u shpall gjyqtari më i mirë i vitit nga Confederation of African Football (CAF), pas ndalimit të hyrjes në SHBA ka marrë një tjetër angazhim të rëndësishëm.
Ai do të jetë pjesë e ndeshjes së Superkupës së UEFA-s mes Paris Saint-Germain dhe Aston Villa, e cila do të zhvillohet më 12 gusht në Salzburg të Austrisë.
