Policia austriake ka arrestuar dy persona për shkak të dyshimit për planifikim të një sulmi terrorist gjatë koncertit të Taylor Swift në Vjenë dhe duket se plani përfshinte edhe disa roje sigurie që do të punonin në ngjarje, pretendon gazeta austriake Kurier.
Sipas informatave të këtij mediumi, disa miq të të dyshuarit kryesor, një 19-vjeçar austriak me prejardhje nga Maqedonia e Veriut, janë të punësuar në firmën e sigurisë që do të kujdesej për sigurinë në koncertin e yllit amerikan të pop-it.
Kurier pretendon se ata ishin përgjegjës që sulmuesit të hynin pa pengesa në mesin e vizitorëve të koncertit, dhe qëllimi ishte të detononin pajisjet eksplozive përpara stadiumit Ernst Happel, ku do të mbahej ky ngjarje. Ende nuk dihet nëse ata morën pjesë në hartimin e planit për sulmin terrorist.
Siç shkruajnë më tej, policia ka gjetur në banesën e të dyshuarit kryesor 19-vjeçar kimikate që ai kishte vjedhur në punë, të nevojshme për krijimin e bombës TATP, ose peroksid aceton. Bëhet fjalë për një eksploziv të fuqishëm, të ndjeshëm ndaj goditjes.
Gjithashtu, nëpërmjet punës së mëtejshme të policisë austriake, janë gjetur postime të të dyshuarit kryesor në forume, ku ai kërkonte informacion për krijimin e një pajisjeje shpërthyese, dhe sipas sasisë së madhe të kimikateve të gjetura në banesën e tij, pajisja ishte pothuajse e përfunduar.
Ky austriak i paemëruar thuhet se i ka pranuar të gjitha planet policisë, dhe me të është arrestuar edhe një 17-vjeçar për të cilin nuk dihet shumë. Kurier shkruan se ai është pjesë e luftërave të bandave në Vjenë dhe se për të kishte një urdhër arresti nga policia rajonale në kryeqytetin e Austrisë.
Kujtojmë se për shkak të kërcënimeve për sulme terroriste janë anuluar të gjitha tre koncertet e planifikuara të Taylor Swift në Vjenë. Të gjithë ata që kishin bileta duhet të marrin paratë mbrapsht brenda 10 ditëve të punës.
